Agjencia e Kombeve të Bashkuara për Refugjatët (UNRWA) ka njoftuar se një në dhjetë fëmijë të kontrolluar në klinikat e saj në Gaza që nga viti 2024 vuan nga kequshqyerja. Sipas drejtoreshës së komunikimit të UNRWA-s, Juliette Touma, shkalla e kequshqyerjes është rritur ndjeshëm, veçanërisht pas shtrëngimit të rrethimit më 2 mars 2025.
Që nga janari 2024, UNRWA ka kontrolluar mbi 240,000 fëmijë nën moshën pesë vjeç, duke zbuluar një situatë alarmante. “Para luftës, kequshqyerja akute ishte pothuajse e panjohur në Gaza.
Një infermiere tha se raste të tilla i kishte parë vetëm në libra shkollorë dhe dokumentarë,” u shpreh Touma.Kriza është përkeqësuar nga mungesa e ilaçeve, ushqimeve, materialeve higjienike dhe karburantit, të cilat po mbarojnë me shpejtësi.
Më 19 maj 2025, Izraeli hoqi një bllokadë 11-javore, duke lejuar dërgesa të kufizuara ndihmash nga OKB-ja, por situata mbetet kritike.UNRWA bën thirrje për veprim urgjent për të adresuar krizën humanitare dhe për të siguruar furnizime për fëmijët dhe familjet e prekura në Gaza.
Prej muajsh, për shkak të luftimeve të vazhdueshme dhe bllokadës së ndihmave, popullsia civile po përballet me mungesë të ujit të pijshëm, ushqimit, ilaçeve dhe strehimit të sigurt. Organizatat ndërkombëtare paralajmërojnë se nëse situata vazhdon me këtë ritëm, pasojat mund të jenë të parikuperueshme për një brez të tërë. Është e pamundur të qëndrosh indiferent kur dëgjon që një foshnje nuk ka as qumësht, apo që një fëmijë 3-vjeçar peshon më pak se norma për një të porsalindur. Kjo nuk është thjesht krizë – është një tragjedi në zhvillim.
UNRWA kërkon ndërhyrje të menjëhershme nga komuniteti ndërkombëtar për të garantuar furnizimin me ndihma humanitare dhe për të shpëtuar jetët e fëmijëve që ndodhen në rrezik të vazhdueshëm. “Nëse nuk veprojmë tani, pasojat do të jenë tragjike,” thuhet në deklaratën zyrtare të agjencisë./Pamfleti
