OKB: Gaza është kthyer në gërmadha, palestinezët përpiqen të mbijetojnë në kushte çnjerëzore

OKB-ja tha sot se Rripi i Gazës, nën sulmet izraelite për tetë muaj, është kthyer në gërmadha dhe se familjet palestineze po përpiqen të mbijetojnë në kushte çnjerëzore.

Gaza është kthyer në gërmadha dhe familjet palestineze duhet të mbijetojnë në kushte çnjerëzore me ujë, ushqim dhe furnizime të pakta, tha agjencia e OKB-së për refugjatët palestinezë, ose UNRWA, në X.

Agjencia e OKB-së tha se vazhdon të sigurojë miell për njerëzit edhe në rrethanat më të rënda dhe të paimagjinueshme, por rrethimi i Gazës duhet të përfundojë menjëherë.

Izraeli ka vazhduar ofensivën e tij brutale në Gaza që nga sulmi i Hamasit më 7 tetor, pavarësisht nga një rezolutë e Këshillit të Sigurimit të OKB-së që kërkon një armëpushim të menjëhershëm.

Rreth 36.400 palestinezë janë vrarë që atëherë në Gaza, shumica dërrmuese gra dhe fëmijë, dhe mbi 82.000 të tjerë janë plagosur, sipas autoriteteve lokale shëndetësore.

Gati tetë muaj pas fillimit të luftës izraelite, zona të gjera të Gazës janë shndërruar në rrënoja, krahas një bllokade gjymtuese të ushqimit, ujit të pastër dhe ilaçeve.

Izraeli akuzohet për gjenocid në Gjykatën Ndërkombëtare të Drejtësisë, e cila në vendimin e saj të fundit e urdhëroi atë të ndalonte menjëherë operacionin e tij në Rafah, ku mbi një milion palestinezë kishin kërkuar strehim nga lufta përpara se të pushtohej./AA

NDANI KËTË POSTIM

Mund tju interesojne