Presidenti kolumbian, Gustavo Petro, të mërkurën kundërshtoi komentet e Presidentit amerikan, Donald Trump, i cili e etiketoi atë si “një bandit dhe një njeri të keq”, duke thënë se do të mbrohet përmes kanaleve ligjore në SHBA pas akuzave që lidhin Kolumbinë me prodhimin e drogës.
“Nga shpifjet që janë hedhur kundër meje në territorin e Shteteve të Bashkuara nga zyrtarë të lartë, unë do të mbrohem përmes gjyqësorit me avokatë amerikanë në sistemin amerikan të drejtësisë”, tha Petro në platformën e kompanisë amerikane të mediave sociale X, pa e përmendur drejtpërdrejt Trumpin.
Duke iu referuar sulmeve të fundit ndaj anijeve që dyshohet se janë përfshirë në trafikun e drogës në Karaibe, Petro tha: “Unë gjithmonë do të qëndroj kundër gjenocideve dhe vrasjeve nga ata që janë në pushtet në Karaibe. Kur të kërkohet ndihma jonë për të luftuar trafikun e drogës, shoqëria amerikane do ta pranojë atë. Ne do të luftojmë kundër trafikantëve të drogës me shtetet që duan ndihmën tonë”.
Në një postim tjetër, ai tha se qeveria amerikane “duket se hedh poshtë përvojën e ndërtuar me Kolumbinë dhe ndryshon strategjinë në një të gabuar, e cila minon sovranitetin e vendeve të Amerikës Latine dhe Karaibeve”.
“Shkalla e fyerjes së Trumpit ndaj Kolumbisë dhe ndaj meje nuk synon të arrijë më një strategji efektive kundër trafikut të drogës, por të ndikojë në zgjedhjet e Kolumbisë vitin e ardhshëm”, shtoi ai, duke akuzuar Trumpin se kërkon “përsëri triumfin e së djathtës ekstreme, e cila është e lidhur fort dhe me prova me trafikun e drogës, por e bindur në përmbushjen e pushtimeve” shtoi ai.
Më parë, Trump kërcënoi të ndërmarrë “masa shumë serioze” kundër Kolumbisë, të cilën e akuzoi për prodhimin e drogës së paligjshme që futet në SHBA.
“Më mirë ta shikojë, ose do të ndërmarrim masa shumë serioze kundër tij dhe vendit të tij”, tha ai, duke iu referuar Petros, i cili ka qenë një kritik i zëshëm i Trumpit për disa çështje, duke përfshirë sulmet e SHBA-së ndaj anijeve që pretendon se transportonin drogë përmes ujërave ndërkombëtare.
Trump gjithashtu e quajti Petron një “bandit dhe burrë të keq” dhe akuzoi vendin e Amerikës së Jugut për prodhimin e drogës së paligjshme që “po hyn në Shtetet e Bashkuara… përgjithësisht përmes Meksikës”./aa
