Sindikatat dhe organizatat sociale organizojnë tubim ndërsa Senati debaton legjislacionin kontrovers për të drejtat e pronës
Sindikatat, organizatat sociale dhe grupet e opozitës marshuan të enjten jashtë Kongresit Kombëtar të Argjentinës në Buenos Aires për të protestuar kundër një projektligji për pronën private të mbështetur nga qeveria, ndërsa Senati po debatonte legjislacionin kontrovers, sipas medieve lokale.
Protestuesit u mblodhën rreth Kongresit duke mbajtur flamuj argjentinas dhe pankarta që hidhnin poshtë reformat e propozuara, ndërsa forcat e sigurisë ndërmorën një operacion të madh dhe vendosën barriera rreth ndërtesës legjislative përpara demonstratës.
Pamjet televizive dhe videot e shpërndara në rrjetet sociale treguan demonstruesit duke thirrur parulla kundër administratës së Presidentit Javier Milei, ndërkohë që ligjvënësit diskutonin projektligjin brenda Senatit.
Protesta u organizua nga Konfederata e Përgjithshme e Punës (CGT), dy degët e Qendrës së Punëtorëve Argjentinas (CTA) dhe organizatat sociale të grupuara nën Unionin e Punëtorëve të Ekonomisë Popullore (UTEP), sipas gazetës së përditshme argjentinase La Nacion.
Mobilizimi i së premtes pritet të përkojë me Ditën e Shën Kajetanit (San Cayetano), kur sindikatat dhe organizatat sociale tradicionalisht marshojnë nën moton “Paqe, Bukë, Tokë, Strehim dhe Punë”, raportoi La Nacion.
Kundërshtarët argumentojnë se projektligji favorizon investitorët e mëdhenj, dobëson mbrojtjen mbi tokën dhe përshpejton procedurat e dëbimit në kurriz të komuniteteve vulnerabël (të ndjeshme).
Senati rinisi debatin pasi qeveria hoqi një nga dispozitat më kontroverse të propozimit, e cila do të lehtësonte kufizimet ndaj pronësisë së të huajve mbi tokën bujqësore, pas kundërshtimeve nga guvernatorët e provincave dhe ligjvënësit.
Projektligji i mbetur përfshin masa për të përshpejtuar procedurat e dëbimit për shtëpitë, arat dhe tokat e pushtuara në mënyrë të paligjshme, për të ndryshuar rregullat e shpronësimit dhe për të amenduar legjislacionin që rregullon tokat e prekura nga zjarret e pyjeve.
Projektligji për pronën është bërë një nga iniciativat legjislative më të debatueshme të Milei-t, duke nxitur kundërshtime nga sindikatat, grupet e majta dhe organizatat peroniste.
Demonstratat vijnë ndërsa administrata Milei vazhdon të shtyjë reformat ekonomike dhe ligjore përmes Kongresit, pavarësisht rezistencës në rritje nga grupet e punës dhe partitë opozitare.
Protesta e së enjtes u fokusua te projektligji për pronën, ndërsa demonstrata e së premtes pritet të zgjerojë kërkesat e saj duke përfshirë punësimin, varfërinë dhe mirëqenien sociale, sipas medieve lokale./anadolu
