Nga Avokat Edmond Petraj
Historia na mëson se Perëndimi gjithmonë ka gjetur mënyra për të përfituar nga gjakderdhja midis popujve me histori të përbashkët. Lufta në Ukrainë nuk është thjesht një konflikt mes dy shteteve – është një tragjedi vëllavrasëse mes dy popujve që për shekuj kanë jetuar së bashku, ndarë të njëjtën kulturë, traditë dhe gjak. Kjo nuk është vetëm një luftë mes Ukrainës dhe Rusisë, por një luftë e manipuluar nga jashtë për interesa të mëdha gjeopolitike dhe ekonomike.
Një skenar i njohur:
Përçarja si strategji
Nuk është hera e parë që Perëndimi ka përdorur ndarjen dhe përçarjen për të dobësuar fuqitë që nuk i binden plotësisht. Në shekujt e fundit, e kemi parë këtë në Lindjen e Mesme, në Ballkan dhe kudo që një unitet historik ka kërcënuar hegjemoninë perëndimore. Në rastin e Ukrainës, skenari është i qartë: të ndihmohet një vëlla që të luftojë tjetrin, të derdhet sa më shumë gjak sllav, ndërsa armët perëndimore rrjedhin pa ndalim dhe korporatat e mëdha numërojnë fitimet.
Cilët janë përfituesit e vërtetë?
Kompleksi ushtarako-industrial i Perëndimit
Lufta është biznes, dhe për SHBA-në dhe aleatët e saj, çdo plumb, çdo raketë, çdo tank që shkatërrohet duhet zëvendësuar me një tjetër, i cili blihet me borxhe që rëndojnë mbi popujt që luftojnë. Kompanitë amerikane dhe evropiane të armëve po shënojnë fitime rekord, ndërsa Ukraina rrënohet dhe Rusia shteron burimet e saj.
Elitat politike perëndimore
Në një kohë kur ekonomitë e tyre po përballen me kriza të brendshme, liderët perëndimorë përdorin luftën si një instrument për të shmangur vëmendjen nga dështimet e tyre. Ukraina shndërrohet në një fushëbetejë ku dërgojnë armë, por kurrë ushtarë të tyre, sepse për ta jeta e ukrainasve dhe rusëve nuk vlen asgjë përveçse si mjet për të rrënuar Rusinë dhe për të mbajtur Evropën të varur nga SHBA.
Industria e energjisë dhe bankat ndërkombëtare
Lufta ka shkatërruar tregjet energjetike, duke u dhënë mundësi korporatave amerikane të gazit dhe naftës të dominojnë tregun evropian. Bankat e mëdha ndërkombëtare kanë përfituar nga rritja e borxheve dhe varësia financiare e vendeve që tani detyrohen të investojnë në mbrojtje.
Popujt vëllezër që po derdhin gjakun për të tjerët
Historia e Ukrainës dhe Rusisë është e ndërthurur. Kievi ishte zemra e Rusisë së vjetër (Kievan Rus’), një lidhje që as lufta më e egër nuk mund ta mohojë. Edhe gjatë periudhës sovjetike, ukrainasit dhe rusët jetonin si pjesë e të njëjtit sistem, me familje të përziera dhe një histori të përbashkët zhvillimi. Tani, ky unitet po copëtohet nga një skenar i përgatitur në zyrat e Washington-it dhe Brukselit.
Njerëzit e zakonshëm, ata që shkojnë në luftë, që humbasin bijtë dhe burrat, nuk kanë asnjë përfitim nga kjo tragjedi. Ata po luftojnë për interesa që nuk janë të tyrat, për një strategji globale që synon dobësimin e Rusisë dhe mbajtjen e Evropës nën ombrellën amerikane.
Luftë që i shërben vetëm të huajve
Kjo nuk është lufta e ukrainasve apo e rusëve, por një luftë që Perëndimi e ndezi dhe po e ushqen për të mbajtur botën në tension dhe për të forcuar pushtetin e tij ekonomik dhe politik. Çdo ditë që kjo luftë vazhdon, fituesit janë në Uashington dhe Londër, ndërsa humbësit janë ata që derdhin gjakun në fushëbetejë.
Popujt me histori të përbashkët duhet të kuptojnë lojën dhe të mos lejojnë të bëhen mish për top për interesat e të tjerëve. Bashkimi i tyre do të ishte frika më e madhe për Perëndimin, ndaj çdo përpjekje për pajtim do të sabotohet. Por historia nuk mund të fshihet me propagandë: vëllezërit janë vëllezër, dhe gjaku nuk mund të bëhet ujë./gazetaimpakt
