Pas arrestimit të kryetarit të Bashkisë së Tiranës, Erion Veliaj, nën akuzat për korrupsion, kryeministri Edi Rama ka njoftuar një mbledhje emergjente me punonjësit e bashkisë në sheshin “Skënderbej” sot në orën 16:30. Kjo lëvizje vjen mes tensioneve të rritura politike dhe pasigurisë institucionale që ka përfshirë administratën e Tiranës.
Burime pranë qeverisë bëjnë me dije se mbledhja ka për qëllim mobilizimin e strukturave bashkiake dhe dhënien e një mesazhi të fortë pas zhvillimeve të fundit. Kryeministri pritet t’u bëjë thirrje punonjësve të bashkisë për të ruajtur stabilitetin administrativ, ndërsa opozita e ka cilësuar këtë një përpjekje për t’i “rreshtuar në vijë” në funksion të interesave të tij politike.
Më vonë, Rama do të zhvillojë një takim edhe me këshilltarët e Partisë Socialiste në Këshillin Bashkiak të Tiranës, ku pritet të diskutohet situata dhe hapat e ardhshëm pas ndalimit të Veliajt. Javën e kaluar, pas takimeve me nënkryetarët e bashkisë, u vendos që firmën e kryebashkiakut ta delegojë Anuela Ristani, një lëvizje që ka shkaktuar debate dhe interpretime të ndryshme.
Në sfondin e kësaj mbledhjeje emergjente, mbetet për t’u parë nëse Rama do të japë sinjale për emrin e mundshëm që do të drejtojë Bashkinë e Tiranës në vijim, apo nëse situata do të marrë një tjetër rrjedhë politike./gazetaimpakt
