“Reporterët pa Kufij” kanë bërë të ditur se kanë paraqitur një ankesë në Gjykatën Ndërkombëtare Penale (GJNP) për krime lufte të kryera kundër gazetarëve në Gaza. E paraqitur në zyrën e prokurorit të GJNP-së, ankesa e “Reporterëve pa Kufij” detajon rastet e nëntë gazetarëve të vrarë që nga 7 tetori në Rripin e Gazës, e cila po përballet me sulme ajrore izraelite që nga sulmi ndërkufitar i Hamasit, si dhe rastet e dy gazetarëve të tjerë që u plagosën gjatë kryerjes së punës së tyre.
Ankesa gjithashtu përmend shkatërrimin e “qëllimshëm, të plotë ose të pjesshëm” të ambienteve të më shumë se 50 mediave në Gaza. Gjithsej 34 gazetarë janë vrarë që nga fillimi i luftës midis Izraelit dhe Hamasit, prej të cilëve, siç njofton “Reporterët pa Kufij” të paktën 12 u vranë gjatë kohës në detyrë, dhjetë në Gaza, një në Izrael dhe një në Liban.
“Shkalla, serioziteti dhe natyra e përsëritur e krimeve ndërkombëtare që shënjestrojnë gazetarët, veçanërisht në Gaza, kërkon një hetim prioritar nga prokurori i GJNP-së. Ne kemi bërë thirrje për këtë që nga viti 2018. Ngjarjet tragjike aktuale tregojnë urgjencën ekstreme të nevojës për veprim të GJNP-së”, tha Christophe Deloire, sekretar i përgjithshëm i “Reporterëve pa Kufij”.
Kjo është ankesa e tretë e “Reporterëve pa Kufij” drejtuar prokurorit të GJNP-së për krimet e luftës kundër gazetarëve palestinezë në Gaza që nga viti 2018.E para u paraqit në maj të vitit 2018 në lidhje me gazetarët e vrarë ose të plagosur gjatë protestave të “Marshimit të Madh të Kthimit” në Gaza. E dyta u paraqit në maj të vitit 2021 pas sulmeve ajrore izraelite në më shumë se 20 media në Rripin e Gazës.
“Reporterët pa Kufij” gjithashtu mbështeti ankesën e paraqitur nga Al Jazeera për vrasjen fatale të gazetares palestineze, Shirin Abu Akleh, në Bregun Perëndimor më 11 maj të vitit 2022./AA