Prokuroria e Tiranës dorëzoi 56 të akuzuar për krijim të skemave mashtruese dhe fshehje të ardhurave, pasi dyshohet se kanë shmangur tatimin mbi vlerën e shtuar, duke i shkaktuar shtetit disa milionë euro dëm ekonomik. Mes të akuzuarve janë edhe 3 shtetas të huaj që kanë shmangur në këtë skemë tatimet së bashku me shtetas shqiptare nën akuzë.
Hetimet nisën pesë vjet më parë pasi drejtoria rajonale gjurmoi gjatë kontrollit tatimor subjekte në fushën e tregtisë së frutave perimeve, të produkteve ushqimore, të prodhimit të duhanit dhe pijeve alkoolike, që nga praktika dyshohet se në ortakëri kryen evazion fiskal. Dy prokurorët e çështjes, Suela Salavaci dhe Valentin Preci, thonë në dosjen voluminoze që Top Channel disponon, se subjektet ndonëse rezultonin me status pasiv kanë shitur e blerë nga njëri tjetri.
Në një rast administratori i shoqërisë “Gjomi” deklaron se kishte aktivitet prodhim qirinjsh dhe nuk kishte detyrim për TVSH. Por kontrollet provojnë të kundërtën. Dosja është tek gjyqtari paraprak dhe është shtyrë disa herë për shkak të numrit të madh të të pandehurve, mes tyre dhe subjektet tregtare./tpz
