Shpërblimet e pensionistëve, qeveria akordon shumën qesharake për të moshuarit, përgjysmim nga viti i kaluar

Pas debateve lidhur me shpërblimin që do të marrin pensionistët këtë fundvit, qeveria pritet që të japë nga 3 mijë lekë për secilin prej tyre, ndërsa deri pak javë më parë ministrja Anila Denaj, tha se nuk kishte asnjë parashikim në buxhet për këtë kategori.

Vendimi më i fundit është marrë nga Ministria e Financave dhe Ekonomisë, e cila po ashtu ka përgatitur edhe një draft për rishikimin për herë të dytë të buxhetit të këtij viti.
Fondi që parashikohet të jepet nga buxheti për këtë qëllim arrin në masën e 2.2 miliard lekëve, ose 22 milion dollarëve, shkruan “Klan”.

Nga ky shpërblim do të përfitojnë gjithsej 731 mijë persona, ku 635 mijë janë pensionistë.

Një vit më parë shpërblimi për këto kategori ishte në masën e 5 mijë lekëve të rinj, por ecuria e dobët e mbledhjes së të ardhurave në buxhetin e shtetit ka përcaktuar një nivel më të ulët të dhënies së këtij bonusi këtë fundvit.

Të ardhurat në buxhetin e shtetit janë realizuar 103 milion dollarë më pak se plani, por rënie në realizim kanë patur edhe shpenzimet publike. Sipas treguesve fiskalë të 10-mujorit, qeveria ka shpenzuar 130 milion dollarë më pak, ku pjesa më e prekur është ajo e shpenzimeve kapitale.

Kërkesa për dhënien e shpërblimit u kërkua fillimisht nga deputetët e Komisionit të Ekonomisë, ndërsa drafti me aktin normativ të ndryshimit të buxhetit pritet të miratohet nga Këshilli i Ministrave javën e parë të muajit dhjetor./tpz

 

NDANI KËTË POSTIM

Mund tju interesojne