Termocentrali i vetëm i Rripit të Gazës ndaloi operacionet të martën pas një ndalese izraelite të importeve të karburantit në territorin palestinez, njoftoi autoriteti energjetik i Gazës.
“Termocentrali është mbyllur plotësisht”, tha autoriteti në një deklaratë të shkurtër.
Të mërkurën e kaluar, Izraeli ndaloi importet e karburantit në Gaza, si pjesë e masave ndëshkuese izraelite për lëshimin e balonave me zjarr nga rajoni i bllokuar.
Që nga viti 2007, Rripi i Gazës ka vuajtur nën një bllokadë të ashpër izraelite që ka privuar afërsisht dy milion banorët e saj nga shumë elemente jetike, përfshirë ushqimin, karburantin dhe ilaçet.
Enklava bregdetare vuan nga një krizë e madhe e energjisë elektrike për shkak të mungesës së furnizimeve.
Rripi i Gazës kërkon rreth 500 megavatë energji elektrike, nga të cilat vetëm 180 megavatë janë në dispozicion, për të përmbushur nevojat e popullatës së tij të dendur.
Gaza aktualisht ka tre burime të energjisë elektrike: Izraeli, i cili siguron 120 megavatë; Egjipti, i cili furnizon 32 megavatë; dhe termocentrali i vetëm i saj, i cili gjeneron midis 40 dhe 60 megavatë./AA