Sot në ora 13.45 në Prizren u mbajt një tubim solidarizues për paqe në Palestinë në kejin buzë lumit Lumbardh përball xhamisë së Sinan Pashës, organizuar nga një grup i qytetarëve në krye me Ilir Gashin, Nehari Toskën dhe Burim Shpejtin. Gjatë mbajtjes së tubimit u shfaq një perfomancë e shkëlqyer nga ana e organizatorëve të tubimit në mbështetje të popullit palestinez në Gaza, Jerusalem dhe Bregut Perëndimor dhe vendosjes së paqes në Palestinë.
Prizreni iu bashkua radhës së qyteteve, krahas Prishtinës, Tiranës dhe Shkupit , si edhe shumë qyteteve tjerë anembanë botës, nga Xhakarta, Karaqi, Stambolli, Bejruti, Teherani, Ankaraja, Novi Pazari, Sarajeva e gjer në Bruksel, , Paris, Londër, Romë, Madrid,Vjenë, Berlin , Washington, etj. , ke me qindra mijëra protestues dhe demonstrues protestuan kundër agresionit izraelit në Gazë, dhe në përkrahje të popullit palestinez për vendosjen e paqes në Palestinë .
Në fillim të perfomancës nga organizatorët e tubimit mbajti një fjalim të shkurtër Burim Shpejtit i cili theksoi përveç tjerash vuajtjet e popullit palestinez gjatë këtyre ditëve e sidomos vrasjet e fëmijëve, grave dhe pleqve të pafajshëm gjatë bombardimeve nga ana e ushtrisë izraelite në Gazë.
Në shenjë respekti për viktimat e pafajshëm palestinez është shfaqur një ekspozitë me fotografi me përjetimet e njerëzve palestinez gjatë bombardimeve në Gaza dhe protestave në Jerusalem dhe Bregun Perëndimor. U shpërndan edhe trëndafila të kuq një numri të pjesëmarrësve të protestës të cilët në mënyrë simbolike i hodhën në lumin Lumbardh të qytetit të Prizrenit.
Pas kësaj u lëshuan një tufë pëllumbash në qiellin e Prizrenit në shenjë paqeje për Palestinën e përvuajtur . Fëmijët mbanin shkronjat me emrin Palestinë, pjesëmarrësit mbanin flamujtë kombëtar, kuq e zi, flamujt të Palestinës dhe të Kosovës, mbanin pankartat me parulla në gjuhën shqipe, angleze dhe boshnjake si dhe brohoritnin sloganin “Free Palestine- Liri Palestinës”. Nëpërmes autoparlanteve u shfaq edhe perfomanca audiofonike me tingujt të ushtimave të aeroplanëve luftararak dhe shpërthimeve nga bombardimet në Gazë. Në përfundim pjesëmarrësit e tubimit të solidarizimit me popullin palestinez dhe për vendosjen e paqes në Palestinë u shpërndanë në mënyrë të qetë. Faik MIFTARI