Ministri i Jashtëm i Venezuelës, Iván Gil, hodhi poshtë ashpër akuzat e ministrit të Jashtëm izraelit, Gideon Saar, duke e quajtur atë “kriminel lufte” dhe duke premtuar se veprimet e Izraelit në Palestinë do të përballen me drejtësi ndërkombëtare.
Gil reagoi pasi Saar, gjatë një fjalimi në Dhomën e Përfaqësuesve dhe Senatin e Paraguait, akuzoi Venezuelën për destabilizimin e rajonit, nxitjen e krizës së refugjatëve dhe për lidhje mes Hezbollah-ut, Hamas-it dhe Jemenit.
Gil i kundërshtoi ashpër këto pretendime, duke deklaruar: “Emri i Venezuelës është shumë i madh për të dalë nga goja jote e pistë dhe duart e tua të njollosura me gjakun e të pafajshmëve. Ne jemi një popull që lufton për sovranitetin tonë dhe mbron të drejtat e njeriut dhe ligjin ndërkombëtar. Ti përfaqëson të kundërtën.”
Ai shtoi se Venezuela nuk shqetësohet nga deklaratat e Saar-it, duke theksuar: “Ajo që ka rëndësi është se herët a vonë, ti do të përballesh me drejtësinë ndërkombëtare.”
Saar aktualisht ndodhet në vizitën e tij të parë zyrtare në Paraguay, ku është takuar me presidentin Santiago Peña, ministrin e Jashtëm Rubén Ramírez dhe një delegacion biznesmenësh. Ai pritet të udhëtojë edhe në Argjentinë.
Venezuela ka dënuar vazhdimisht veprimet ushtarake izraelite në Gaza dhe në rajon, duke kërkuar që udhëheqësit izraelitë të ndiqen penalisht si kriminelë lufte.
Venezuela nuk do ta braktisë kauzën e shenjtë të Palestinës: Maduro
Me rastin e 15 nëntorit, Ditës së Pavarësisë së Palestinës, presidenti venezuelian Nicolás Maduro theksoi se populli palestinez ka një të drejtë të patjetërsueshme për jetë, paqe dhe krijimin e një shteti të pavarur. Ai shtoi se pavarësisht marrëveshjeve aktuale për armëpushim, paqja e vërtetë nuk mund të arrihet pa drejtësi.
“Do të kemi paqe të vërtetë vetëm kur drejtësia të vihet në vend për krimet dhe gjenocidin e kryer. Vetëm atëherë mund të fillojmë të rimëkëmbemi nga gërmadhat dhe shkatërrimi,” tha ai, duke riafirmuar thirrjen e Venezuelës për drejtësi.
Maduro gjithashtu nënvizoi rëndësinë e mobilizimit të opinionit publik global për t’i dhënë fund, siç e përshkroi ai, ciklit të vazhdueshëm të “masakrave të ndjekura nga marrëveshjet”, duke theksuar angazhimin e Venezuelës për rindërtimin e Gazës dhe mbështetjen e popullit palestinez.
“Kjo do të jetë një moment historik dinjiteti dhe krenarie,” përfundoi Maduro, duke iu referuar ditës kur Palestina do të arrijë pavarësinë e plotë./mayadeen
