Pesë parti politike zvicerane kanë rënë dakord të kufizojnë përdorimin e Inteligjencës Artificiale (AI) në fushatat e tyre për zgjedhjet federale të 22 tetorit.
Siç raportoi agjencia shtetërore e lajmeve ‘Swissinfo’, nënshkruesit e deklaratës së përbashkët, respektivisht Partia Socialdemokrate, Partia e Qendrës, Partia e Gjelbër, Partia e Gjelbër Liberale dhe Partia Protestante, udhëzuan seksionet e tyre kantonale që të respektojnë kodin e sjelljes, i cili thotë se çdo përdorim i AI-së gjatë fushatave politike duhet të deklarohet në mënyrë eksplicite.
Partitë politike po ashtu ndalojnë përdorimin e AI-së në të ashtuquajturat “fushata negative”, ku ata sulmojnë kundërshtarët e tyre politik.
“AI përfaqëson një mundësi për të mundësuar forma të reja komunikimi. Por ajo gjithashtu paraqet rreziqe, duke e bërë të mundur që të shtrembërohen faktet ose t’i atribuohen gjëra aktorëve të caktuar politik që ata nuk do t’i kishin thënë”, thuhet në deklaratën e përbashkët.
Megjithatë, Partia Radikale-Liberale nuk e nënshkroi deklaratën, por tha se është e angazhuar të ndalojë çdo përdorim abuziv të AI-së.
Duke argumentuar se kufijtë e asaj që përbën një fushatë negative janë të paqarta, Partia Popullore Zvicerane refuzoi ndërmarrjen e angazhimeve për këtë çështje./BW
