Nga Dardan Rexhepi
Policia paska arrestuar imamin boshnjak, dr. Elvedin Pezić, për shkak se kishte ardhur në Kosovë për të promovuar një libër me tematikë fetare. Ndërsa Ben Blushin, i cili gjithashtu ka promovuar në Kosovë një libër me tematikë islamofobe, jo vetëm që nuk e kanë arrestuar, por madje e kanë shpërblyer me çmimin më të mirë.
Personalisht, nuk e njoh imamin Pezić, nuk i di bindjet e tij dhe as nuk e di se në çfarë thërret. Por ajo që më dhemb është padrejtësia që iu bëhet muslimanëve nga organet shtetërore në Kosovë.
Nëse imami Pezić konsiderohet person i rrezikshëm, atëherë lind pyetja: pse iu lejua të hyjë në Kosovë? Pse nuk u kthye në pikën kufitare, ashtu siç veprohet me personat që konsiderohen të padëshiruar apo të papërshtatshëm për të hyrë në një shtet? Pse u la të hyjë dhe më pas u arrestua me pranga?
Kjo më shumë i përngjan poshtërimit dhe kërcënimit ndaj muslimanëve sesa një mase sigurie./gazetaimpakt
