“EuroMed Rights”, një rrjet prej 68 organizatash, institucioneve dhe individëve të të drejtave të njeriut me bazë në 30 vende në gjithë Evropën dhe rajonin e Mesdheut me qendër në Gjenevë të Zvicrës, paraqiti raportin e tij në sesionin e 54-të të Këshillit të OKB-së për të Drejtat e Njeriut.
Numri i sulmeve të kolonëve në gjysmën e parë të vitit 2023 arriti në 1.148, “pothuajse e barabartë me numrin total të sulmeve të regjistruara në (gjithë) vitin e kaluar (2022), që ishte 1.187”, tha një përfaqësuese e organizatës për të drejtat e njeriut, duke shtuar se një dhunë e tillë është kryer “nën mbulimin politik të qeverisë izraelite”.
“Kjo rritje tregon një nivel të paprecedentë të dhunës, me pothuajse asnjë masë përgjegjësie apo ndëshkimi”, tha ajo në videon që EuroMed ndau në mediat sociale, pa përmendur emrin e saj.
Ajo vuri në dukje se “retorika provokuese” e ministrave të qeverisë izraelite është një “kontribuues i madh në rritjen e ndjeshme të dhunës së kolonëve, pasi qeveria i mbështet kolonët në mënyra të ndryshme, duke përfshirë mbrojtjen e tyre nga siguria apo ndjekja gjyqësore”.
Ajo e përfundoi fjalimin e saj duke i kërkuar komunitetit ndërkombëtar “të jetë i pranishëm në terren për të mbrojtur komunitetet e pambrojtura palestineze në rrezik zhvendosjeje, si dhe për të ndërmarrë hapa konkretë për t’i bërë presion Izraelit që t’i japë fund pushtimit të tij ushtarak”.
Në shtator, Zyra e OKB-së për Koordinimin e Çështjeve Humanitare (OCHA) tha se që nga viti 2022, mbi 1.100 palestinezë nga 28 komunitete janë zhvendosur, duke përmendur si arsye dhunën në rritje dhe parandalimin e qasjes në tokat e kullotës nga kolonët e paligjshëm izraelitë.
“OKB-ja ka regjistruar nivele të paprecedentë të dhunës së kolonëve kundër palestinezëve këtë vit”, tha Lynn Hastings, koordinatore e OCHA-së për territorin e pushtuar palestinez.
Qeveritë e njëpasnjëshme izraelite kanë promovuar zgjerimin e vendbanimeve kolone në territoret e pushtuara palestineze, por qeveria e ekstremit të djathtë e kryeministrit aktual Benjamin Netanyahu e ka bërë atë prioritet kryesor.
Disa ministra izraelitë, duke përfshirë ministrin e financave Bezalel Smotrich dhe ministrin e Sigurisë Kombëtare Itamar Ben-Gvir, kanë bërë deklarata të qarta duke inkurajuar dhunën e kolonëve dhe duke u zotuar të zgjerojnë ndërtimin e vendbanimeve kolone në të gjitha territoret e pushtuara.
Të gjitha vendbanimet kolone në territoret e pushtuara janë të paligjshme sipas ligjit ndërkombëtar./AA
