Irani ka dënuar akuzat e Izraelit kundër disa punonjësve të agjencisë së OKB-së për refugjatët palestinezë (UNRWA) si një tjetër veprim dashakeq dhe pjesë e trajtimit çnjerëzor të regjimit sionist ndaj palestinezëve.
Zëdhënësi i Ministrisë së Jashtme të Iranit Naser Kanani tha të dielën se Izraeli i ka ngritur këto akuza për të justifikuar kufizimet e tij ndaj organizatave humanitare aktive në Rripin e Gazës dhe në Bregun Perëndimor të pushtuar.
Ai tha se akuzat synojnë, gjithashtu, ta imunizojnë Izraelin nga krimi i paprecedentë dhe i urryer i vrasjes së të paktën 150 anëtarëve të institucioneve ndërkombëtare, si UNRWA, që nga fillimi i tetorit.
Zyrtari iranian shprehu keqardhjen, gjithashtu, për vendimin e vendeve perëndimore për të shkurtuar fondet e UNRWA-s në sfondin e akuzave izraelite.“Një sjellje e tillë praktikisht nënkupton pranimin e pretendimeve të një regjimi kriminal, i cili, sipas një vendimi të lëshuar nga Gjykata Ndërkombëtare e Drejtësisë, akuzohet për gjenocid ndaj palestinezëve dhe duhet të mbajë përgjegjësi përpara kësaj gjykate dhe opinionit publik botëror”, deklaroi Kanani.
Ai tha se presioni ndaj UNRWA-së dhe kufizimi i aktiviteteve të saj ose parandalimi i dërgimit të ndihmave humanitare për njerëzit që po vuajnë nga kushtet kritike të luftës dhe po përballen me kërcënimin e gjenocidit nuk tregon asgjë tjetër veçse deklarimin e besimit në historinë e një krimineli lufte. “Në vend që të shpallnin vendimin e tyre për të pezulluar fondet për UNRWA, vendet perëndimore do të duhej të ndalonin ndihmën e tyre ushtarake dhe diplomatike për Izraelin”, tha zyrtari iranian.
“Irani u bën thirrje të gjitha kombeve që kërkojnë liri, veçanërisht vendeve myslimane, që t’i rezistojnë Izraelit dhe të bëjnë çdo përpjekje për të mbështetur palestinezët”, tha Kanani. Shtetet e Bashkuara njoftuan të premten se po ndalonin fondet për UNRWA për shkak të akuzave izraelite kundër 12 punonjësve të kësaj agjencie.
Kanadaja dhe Australia ndoqën shembullin e SHBA-së dhe njoftuan një pauzë të ngjashme financimi për UNRWA, e cila është një burim kritik i mbështetjes për njerëzit në Gaza. Të shtunën, Britania, Gjermania, Italia, Holanda, Zvicra, Skocia dhe Finlanda iu bashkuan Shteteve të Bashkuara në ndalimin e financimit të agjencisë së OKB-së për refugjatët palestinezë./parstoday
