Ushtria izraelite arrestoi 28 palestinezë të tjerë në bastisjet ushtarake të kryera në të gjithë Bregun Perëndimor të pushtuar, sipas grupeve që merren me çështjet e të burgosurve. “Arrestimet u shoqëruan me abuzime, rrahje të rënda dhe kërcënime kundër të burgosurve dhe familjeve të tyre, si dhe me akte të përhapura të sabotimit dhe shkatërrimit të shtëpive të qytetarëve”, thuhet në deklaratën e përbashkët të Komisionit për Çështjet e të Burgosurve dhe Shoqatës së të Burgosurve Palestinezë.
Sipas deklaratës, me arrestimet e fundit, numri i palestinezëve të arrestuar nga Izraeli në Bregun Perëndimor që nga 7 tetori ka shkuar në 5.810. Shifrat e publikuara nga dy grupet muajin e kaluar treguan se të paktën 8.800 palestinezë, përfshirë 80 gra, mbahen në burgjet izraelite.
Tensionet janë rritur në të gjithë Bregun Perëndimor që kur Izraeli filloi ofensivën e pamëshirshme ushtarake kundër Rripit të Gazës pas sulmit ndërkufitar nga Hamasi. Të paktën 23.357 palestinezë janë vrarë që atëherë, kryesisht gra dhe fëmijë, dhe 59.410 të tjerë janë plagosur, sipas autoriteteve shëndetësore palestineze./AA
