Ministri i Jashtëm izraelit Israel Katz u kërkoi më shumë vendeve të shtunën të ndalojnë financimin e Agjencisë së OKB-së për Refugjatët Palestinezë (UNRWA) pas akuzave për përfshirje nga punonjësit e saj në sulmin e 7 tetorit ndaj Izraelit. “Lidhjet e UNRWA-së me Hamasin, duke siguruar strehim për terroristët dhe duke përjetësuar sundimin e tij, janë të pamohueshme”, shkroi Katz në “X”.
Ai u kërkoi autoriteteve të largojnë udhëheqjen e UNRWA-së dhe tha se ajo duhet t’i nënshtrohet një hetimi gjithëpërfshirës në lidhje me ndërgjegjësimin e tyre për veprimet. “Në rindërtimin e Gazës, UNRWA-ja duhet të zëvendësohet me agjenci të përkushtuara për paqen dhe zhvillimin e vërtetë”, tha ai.
SHBA-ja, Britania, Italia, Australia, Kanadaja, Finlanda dhe Holanda vendosën të pezullojnë fondet për UNRWA-në pas pretendimeve të Izraelit të premten. UNRWA-ja tha se ndërpreu kontratat me disa punonjës me dyshimet për përfshirje në sulm.
Norvegjia mirëpriti hetimet ndaj disa punonjësve, por tha se do të vazhdojë të mbështesë palestinezët nëpërmjet UNRWA-së. Irlanda gjithashtu njoftoi se nuk do të pezullojë fondet për agjencinë e OKB-së.
Pavarësisht një vendimi të përkohshëm të premten nga Gjykata Ndërkombëtare e Drejtësisë që urdhëroi Tel Avivin të parandalonte aktet e gjenocidit në Gaza, Izraeli vazhdoi sulmet e tij kundër enklavës bregdetare, ku të paktën 26.257 palestinezë janë vrarë, kryesisht gra dhe fëmijë, dhe 64.797 janë plagosur që nga 7 tetori, sipas autoriteteve palestineze shëndetësore.
Lufta izraelite ka zhvendosur brenda 85 për qind të popullsisë së Gazës, e cila përballet me mungesë akute të ushqimit, ujit të pastër dhe ilaçeve, ndërsa më shumë se gjysma e infrastrukturës së enklavës, sipas OKB-së, është dëmtuar ose shkatërruar./AA
