Të paktën 43 persona janë vrarë nga sulmet izraelite që nga agimi i së hënës në Rripin e Gazës, raportojnë burime mjekësore lokale. Mes të vrarëve janë edhe të paktën 13 palestinezë që po përpiqeshin të merrnin ndihma ushqimore nga qendrat e shpërndarjes, të cilat operohen nga Fondacioni Humanitar i Gazës (GHF), i mbështetur nga SHBA-të dhe Izraeli. Kombet e Bashkuara e kanë dënuar këtë fondacion për “armatosjen” e ndihmës humanitare.
Numri i përgjithshëm i viktimave palestineze në luftën që po zgjat prej 20 muajsh ka kaluar tashmë 56,000, ndërsa mbi 131,000 të tjerë janë plagosur.
Korrespondenti i Al Jazeera, Hani Mahmoud, raportoi nga Gaza City se sulmet izraelite kanë shënjestruar kampet e ndihmës në Rafah dhe në Korridorin Netzarim, ku turma të uritura përpiqen të sigurojnë ushqim për familjet e tyre.
Agjencia shtetërore palestineze Wafa bëri me dije se katër persona u vranë nga një sulm ajror në një ndërtesë banimi në Jabalia, ndërsa tre vëllezër të tjerë u vranë nga forcat izraelite ndërsa po inspektonin shtëpinë e tyre të shkatërruar në Beit Lahiya, në veri të Gazës.
Në kampin e refugjatëve Nuseirat, spitali Al-Awda konfirmoi se ka pranuar trupat e dy viktimave dhe ka trajtuar 35 të plagosur nga një tjetër sulm izraelit përgjatë rrugës Salah al-Din. Gjendja e 16 prej tyre ishte kritike.
Ndërkohë, artileria izraelite ka goditur edhe lagjen Shujayea në lindje të qytetit të Gazës.
Kriza energjetike përkeqëson situatën
Ndërkohë, Këshilli Norvegjez për Refugjatët (NRC) paralajmëroi për krizën energjetike që po përkeqëson më tej gjendjen në Gaza. Në një raport të ri, NRC thekson se ndalimi i qëllimshëm i energjisë – përfshirë energjinë elektrike dhe karburantin – po ndikon drejtpërdrejt në mbijetesën e popullatës.
“Në Gaza, energjia nuk është luks – është çështje mbijetese,” tha Benedicte Giaever, drejtuese e NORCAP, një degë e NRC-së. Ajo shtoi se mungesa e energjisë ka ndikuar në funksionimin e spitaleve, ku operacionet urgjente shtyhen dhe pajisje jetike si ventilatorët apo inkubatorët nuk mund të përdoren.
Izraeli vazhdon të mbajë të mbyllura pikat kufitare dhe të bllokojë futjen e ndihmave jetike si ushqimi, ilaçet dhe karburanti, duke e përkeqësuar gjendjen humanitare në enklavë. /mesazhi
