Vendimi për përdorimin e armëve bërthamore duhet të merret nga qeniet njerëzore, jo nga inteligjenca artificiale, ranë dakord të shtunën presidenti amerikan Joe Biden dhe presidenti kinez Xi Jinping, njoftoi Shtëpia e Bardhë. “Dy liderët konfirmuan nevojën për të ruajtur kontrollin njerëzor mbi vendimet për përdorimin e armëve bërthamore. Të dy liderët theksuan gjithashtu nevojën për të shqyrtuar me kujdes rrezikun e mundshëm dhe zhvillimin e teknologjive të AI në sektorin ushtarak në një mënyrë të kujdesshme dhe të përgjegjshme”, thuhet në deklaratë.
Përmbledhja zyrtare e mbledhjes së qeverisë kineze konfirmoi deklaratën e SHBA. Ministria e Jashtme e Kinës nuk iu përgjigj menjëherë një kërkese për koment. Nuk është e qartë nëse takimi do të çojë në bisedime të mëtejshme apo veprime për këtë çështje. Por është hera e parë që të dy vendet kanë pasur një diskutim rreth armëve bërthamore dhe AI. Për muaj të tërë, Uashingtoni është përpjekur të inkurajojë Pekinin që t’i japë fund rezistencës së tij të gjatë ndaj bisedimeve për armët bërthamore. Të dy vendet rifilluan shkurtimisht bisedimet në nivel zyrtar për armët bërthamore në nëntor, por ato bisedime që atëherë kanë ngecur dhe një zyrtar i lartë amerikan ka shprehur publikisht zhgënjimin me përgjigjen e Kinës.
Bisedimet zyrtare për kontrollin e armëve bërthamore nuk priten së shpejti, pavarësisht shqetësimeve të SHBA-së për ndërtimin e shpejtë të armëve bërthamore të Kinës, megjithëse komunikimet gjysmë zyrtare kanë vazhduar. Për çështjen e inteligjencës artificiale, Kina dhe SHBA nisën bisedimet e tyre të para zyrtare dypalëshe për këtë çështje në maj në Gjenevë, por ato bisedime nuk besohet të kenë vendimmarrjen./sot
