Maldivet i bënë thirrje të mërkurën Gjykatës Ndërkombëtare Penale (GJNP) të hetojë akuzat për krime lufte të kryera nga Izraeli kundër palestinezëve. “Veprimet e qëllimshme të Forcave izraelite të Mbrojtjes janë të barabarta me krime lufte dhe shkelje e hapur e ligjit ndërkombëtar humanitar”, tha presidenti i Maldiveve, Mohamed Muizzu në një deklaratë gjatë shënimit të Ditës Ndërkombëtare të Solidaritetit me Popullin Palestinez.
Duke dënuar luftën e Izraelit në Gaza, Muizzu e përshkroi atë si “pushtim brutal dhe dënim kolektiv që po bën Izraeli kundër civilëve të pafajshëm të Palestinës”. Ai bëri thirrje “për armëpushim të menjëhershëm në Rripin e Gazës, sigurimin e mallrave thelbësore, përfshirë ushqimin, karburantin dhe ilaçet, dhe fundin e zhvendosjes masive të detyruar në Palestinën e pushtuar”.
Maldivet besojnë se një shtet i pavarur palestinez është çelësi i paqes së qëndrueshme, theksoi ai. Ndërkohë, Indonezia gjithashtu bëri thirrje për një shtet të pavarur të Palestinës. “OKB-ja duhet të votojë për anëtarësimin e plotë të Palestinës, e cila aktualisht mban statusin e vëzhguesit jo-anëtar”, tha ministri i Jashtëm indonezian, Retno Marsudi në seancën e Asamblesë së Përgjithshme të OKB-së të martën.
Duke iu drejtuar takimit të OKB-së, ministri i Jashtëm i Malajzisë, Zambry Abd Kadir bëri thirrje të zëshme për armëpushim të qëndrueshëm dhe të menjëhershëm në Gaza, duke hedhur poshtë zhvendosjen e detyruar të palestinezëve.
Ai bëri thirrje për furnizim të papenguar të ndihmave humanitare për enklavën e rrethuar palestineze. Izraeli nisi fushatë masive ushtarake në Rripin e Gazës pas një sulmi ndërkufitar nga Hamasi më 7 tetor.
Që nga fillimi i luftimeve janë vrarë mbi 15.000 palestinezë, përfshirë 6.150 fëmijë dhe 4.000 gra, sipas autoriteteve shëndetësore në enklavë. Numri zyrtar i të vdekurve në Izrael është 1.200./AA
