Mbreti Abdullah II i Jordanisë diskutoi për rolin e komunitetit ndërkombëtar në presionin për një armëpushim të menjëhershëm në luftën Izrael-Hamas gjatë një turneu rajonal në Bahrein, Katar dhe Emiratet e Bashkuara Arabe (EBA).
Mbreti Abdullah u takua me Emirin e Katarit Sheikh Tamim bin Hamad Al Thani në kryeqytetin Doha të mërkurën, njoftoi Agjencia jordaneze e lajmeve. Gjatë takimit, Abdullah tha se “zgjidhja ushtarake apo ajo e sigurisë nuk do të ketë sukses në zgjidhjen e çështjes palestineze dhe se ajo që nevojitet është një zgjidhje politike për të arritur një paqe të drejtë dhe gjithëpërfshirëse mbi bazën e zgjidhjes me dy shtete”.
Ai “paralajmëroi kundër zgjerimit të ciklit të dhunës në rajon” dhe përsëriti refuzimin e Jordanisë ndaj përpjekjeve për të zhvendosur me forcë palestinezët në Gaza ose për të shkaktuar zhvendosjen e tyre të brendshme. Të dy udhëheqësit theksuan gjithashtu rëndësinë e mbrojtjes së civilëve dhe lejimin e dërgimit të pandërprerë të ndihmave humanitare në Gaza dhe mbajtjen e koordinimit dhe konsultimit midis dy vendeve në dritën e zhvillimeve të shpejta.
Mbreti Abdullah u takua me mbretin Hamad bin Isa Al Khalifa gjatë vizitës së tij në Bahrein, ku theksuan “rëndësinë e mundësimit të punës së organizatave ndërkombëtare humanitare në zonë dhe vazhdimin pa pengesa”, si dhe “paralajmëruan kundër përkeqësimit të vazhdueshëm të situatës në Gaza”.
Të dy liderët kërkuan “shtimin e përpjekjeve diplomatike rajonale dhe ndërkombëtare, parandalimin e zhvendosjes së detyruar të banorëve të Gazës, ndalimin e përshkallëzimit si dhe gjetjen e një horizonti politik për të arritur paqe të drejtë, të qëndrueshme dhe gjithëpërfshirëse, bazuar në zgjidhjen me dy shtete”.
Gjatë vizitës së tij në EBA, Mbreti Abdullah u takua me presidentin Sheikh Mohamed bin Zayed Al Nahyan. Ata diskutuan për përshkallëzimin e vazhdueshëm në rajon dhe forcimin e marrëdhënieve dypalëshe në fusha të ndryshme.
Të dy liderët diskutuan mbi situatën e përkeqësuar humanitare në Rripin e Gazës dhe nevojën e përpjekjeve urgjente ndërkombëtare për të ndaluar përshkallëzimin e rrezikshëm ushtarak dhe për të ofruar mbrojtje të plotë për civilët. Ata “shprehën dëshirën për të shtuar veprimet e përbashkëta drejt arritjes së paqes rajonale bazuar në mbështetjen e rrënjosur thellë të dy vendeve për bashkëjetesën dhe bashkëpunimin rajonal në shërbim të të gjithë popujve”.
Lidhur me marrëdhëniet dypalëshe, të dy liderët diskutuan për “fushat e bashkëpunimit zhvillimor, veçanërisht në sektorët e ekonomisë, investimeve, industrisë dhe sigurisë ushqimore, ndër sektorë të tjerë jetikë që u shërbejnë prioriteteve strategjike të dy vendeve drejt zhvillimit të qëndrueshëm dhe prosperitetit”.
Ata ranë dakord se “projektet e shpallura gjatë vizitës përfaqësojnë një hap të madh në partneritetin ambicioz të zhvillimit midis EBA-së dhe Jordanisë”./AA
