Mes protestave të vazhdueshme gjatë vizitës së tij në kryeqytetin amerikan, kryeministri izraelit Benjamin Netanyahu u përball me një bojkot të paprecedentë nga rreth gjysma e demokratëve në Dhomën e Përfaqësuesve dhe Senatit, teksa dje iu drejtua një sesioni të përbashkët të Kongresit Amerikan. Bazuar në një analizë gjithëpërfshirëse të deklaratave publike, raportimeve të mediave dhe pamjeve video, Anadolu përcaktoi se një numër historik i përfaqësuesve të Dhomës dhe senatorëve e anashkaluan fjalimin e Netanyahut. Me gjithsej 96 ligjvënës, ky është gati dyfishi i numrit të demokratëve që bojkotuan fjalimin e tij në vitin 2015, kur bojkotuan 58 ligjvënës.
Numri gjithëpërfshirës i atyre që bojkotuan është në kontrast të plotë me dhjetëra duartrokitje që Netanyahu mori nga shumë ligjvënës të pranishëm të mërkurën. Teksa shumë ligjvënës kishin shpallur më parë synimin e tyre për të bojkotuar fjalimin, përfaqësuesja Rashida Tlaib, e vetmja ligjvënëse palestinezo-amerikane, zgjodhi të merrte pjesë, duke veshur një “keffiyeh” dhe duke mbajtur një tabelë ku thuhej “kriminel lufte” në njërën anë dhe “fajtor për gjenocid” nga ana tjetër, duke shfaqur dukshëm kundërshtimin e saj për fjalimin.
Pasi Netanyahu përfundoi fjalët e tij, Tlaib tha se duartrokitjet dhe ovacionet për kryeministrin izraelit ishin “të neveritshme”. Kritikat e saj nuk ishin të vetmet. Nancy Pelosi, ish-kryetarja e Dhomës së Përfaqësuesve, e quajti fjalimin e Netanyahut “fjalimin më të keq” të një lideri të huaj në historinë e SHBA-së.
“Prezantimi i Benjamin Netanyahut sot ishte prezantimi më i keq i çdo personaliteti të huaj të ftuar dhe të nderuar me privilegjin për t’iu drejtuar Kongresit të Shteteve të Bashkuara”, tha Pelosi në X.
“Shumë prej nesh që e duan Izraelin kaluan kohë sot duke dëgjuar qytetarët izraelitë, familjet e të cilëve kanë vuajtur pas sulmit terrorist të Hamasit të 7 tetorit dhe rrëmbimeve”, shkroi ajo, duke shtuar:
“Këto familje po kërkojnë një marrëveshje armëpushimi që do t’i sjellë pengjet në shtëpi. Dhe, ne shpresojmë që kryeministri të kalojë kohën e tij për të arritur këtë qëllim”.
Për shumë demokratë, vendimi i kryetarit të Dhomës së Përfaqësuesve, Mike Johnson dhe liderit të shumicës në Senat, Chuck Schumer, për të ftuar Netanyahun, ishte i pafalshëm përballë numrit në rritje të të vdekurve në Gaza, duke ngritur pikëpyetje hipokrizie.
“Gaza është shkatërruar nga ushtria izraelite duke përdorur armë të siguruara nga Shtetet e Bashkuara. Mbi 39 mijë palestinezë, kryesisht gra dhe fëmijë, janë vrarë dhe më shumë po vriten çdo ditë. Shumica e shtëpive, pjesa më e madhe e infrastrukturës, janë shkatërruar. E megjithatë, çfarë bëjmë ne? Ne e mirëpresim krahëhapur Netanyahun, personin përgjegjës për këtë, që t’i drejtohet Kongresit”, tha përfaqësuesja Summer Lee, një nga dhjetra ligjvënësit që bojkotuan.
“Kur Putini kryen krime lufte, ne e dënojmë atë. Kur Netanyahu kryen krime lufte, ne i japim justifikime dhe bomba. Kjo hipokrizi nuk është e huaj në botë”, shtoi ajo vetëm disa orë përpara se Netanyahu të mbante fjalimin e tij.
Këto ndjenja nxjerrin në pah përçarjet në rritje brenda Partisë Demokratike, e cila deri vonë ishte shumë më e bashkuar në mbështetjen e saj për Izraelin.
Përfaqësuesi Ritchie Torres, një mbrojtës i fuqishëm i mbështetjes së vazhdueshme të SHBA-së për Izraelin, tha se ai mori pjesë në fjalimin e Netanyahut sepse çdo dallim që ai mund të ketë me liderin izraelit “janë tejkaluar shumë nga lidhja e pathyeshme e marrëdhënieve SHBA-Izrael, qëndrueshmëria e së cilës do t’i rezistojë kohës”.
“Unë jam një kampion krenar i miqësisë më të madhe në botë. Kam qenë gjithmonë një sionist dhe do të jem gjithmonë. #AmYisraelChai”, shtoi ai, duke përdorur një frazë hebraike që do të thotë “populli i Izraelit jeton”.
Lista e anëtarëve të Kongresit që nuk morrën pjesë në fjalim është si në vijim:
– Senat
1. Laphonza Butler
2. Ben Cardin
3. Tom Carper
4. Tammy Duckworth
5. Dick Durbin
6. Martin Heinrich
7. Mazie Hirono
8. Tim Kaine
9. Angus King
10. Ben Ray Lujan
11. Ed Markey
12. Bob Menendez
13. Jeff Merkley
14. Patty Murray
15. Jack Reed
16. Bernie Sanders
17. Brian Schatz
18. Jeanne Shaheen
19. Chris Van Hollen
20. Elizabeth Warren
21. Peter Welch
22. Sheldon Whitehouse
23. Ron Wyden
– Dhoma e Përfaqësuesve
- Becca Ballint
- Nanette Barragan
- Ami Bera
- Don Beyer
- Lisa Blunt Rochester
- Suzanne Bonamici
- Jamaal Bowman
- Cori Bush
- Andre Carson
- Greg Casar
- Joaquin Castro
- Judy Chu
- Emmanuel Cleaver
- Jim Clyburn
- Steve Cohen
- Bonnie Watson Coleman
- Madeleine Dean
- Diana DeGette
- Suzan DelBene
- Mark DeSaulnier
- Rosa DeLauro
- Debbie Dingell
- Lloyd Doggett
- Veronica Escobar
- Anna Eshoo
- Teresa Leger Fernandez
- Valerie Foushee
- Maxwell Frost
- Ruben Gallego
- John Garamendi
- Chuy Garcia
- Robert Garcia
- Al Green
- Raul Grijalva
- Chrissy Houlahan
- Jared Huffman
- Sara Jacobs
- Pramila Jayapal
- Hank Johnson
- Ro Khanna
- Rick Larsen
- Barbara Lee
- Summer Lee
- Zoe Lofgren
- Stephen Lynch
- Thomas Massie
- Doris Matsui
- Betty McCollum
- Jim McGovern
- Kweisi Mfume
- Gwen Moore
- Kevin Mullin
- Alexandria Ocasio-Cortez
- Ilhan Omar
- Bill Pascrell
- Ish-kryetarja Nancy Pelosi
- Mary Sattler Peltola
- Chellie Pingree
- Mark Pocan
- Katie Porter
- Ayanna Pressley
- Delia Ramirez
- Jan Schakowsky
- Adam Smith
- Melanie Stansbury
- Mark Takano
- Mike Thompson
- Bennie Thompson
- Jill Tokuda
- Paul Tonko
- Lori Trahan
- Gabe Vasquez
- Nydia Velazquez
Teksa Netanyahu mbante fjalimin në Kapitol, mijëra demonstrues u mblodhën jashtë, duke protestuar kundër tij dhe luftës së vazhdueshme të Izraelit në Rripin e Gazës, e cila ka rezultuar në vdekjen e të paktën 39.100 palestinezëve. Protestuesit bënë thirrje për një armëpushim të menjëhershëm në Gaza dhe denoncuan vendimin për t’i dhënë liderit izraelit një nga nderimet më të larta të mundshme për një lider të huaj.
Një nga protestuesit, McKenzie Manns, tha për Anadolu se është “i egërsuar” që Netanyahu po viziton Kongresin, duke thënë se “ai po kryen një gjenocid tani”.
“Mendoj se është çmenduri më e madhe që Kongresi ynë e mirëpriti dhe e lejoi të shkelte në këtë vend, dhe kjo është arsyeja pse ne jemi këtu, sepse nuk mund të vrasësh një popull të tërë dhe pastaj të vish dhe të prezantosh fjalime sikur ti je një fëmijë i mirë”, shtoi Manns.
Presidenti amerikan Joe Biden është planifikuar të takohet me Netanyahun në Shtëpinë e Bardhë sonte për të diskutuar situatën në Gaza, përparimin drejt një armëpushimi dhe lirimin e pengjeve. Netanyahu do të zhvillojë gjithashtu një takim të veçantë me zv.presidenten Kamala Harris.
Nesër, Netanyahu pritet të takohet me kandidatin republikan për president dhe ish-presidentin Donald Trump në rezidencën e tij në Florida.