Lëvizja Hamas do të shmangë negociatat me regjimin sionist deri në lirimin e të burgosurve të vet. Sipas agjencisë së lajmeve Mehr, duke cituar rrjetin televiziv Al-Jazeera, armëpushimi i brishtë në Gaza tani është në prag të kolapsit, pasi sionistët shkelën dje marrëveshjen e armëpushimit duke refuzuar të lirojnë 620 të burgosur palestinezë në këmbim të lirimit të 6 të burgosurve të tyre të mbajtur nga Hamasi.
Bazuar në këtë, Basem Naim, një nga liderët e Lëvizjes Hamas tha: “Hamasi ka reaguar për këtë çështje dhe vazhdimi i procesit të negociatave do të ndikohet nga kjo çështje.”
Naim vuri në dukje: “Para lirimit të të burgosurve palestinezë, për të cilin është rënë dakord në këmbim të lirimit të gjashtë të burgosurve sionistë, Hamasi nuk do të ketë asnjë bisedë me armikun përmes ndërmjetësve për hapin e ardhshëm në marrëveshjen e armëpushimit, përveç nëse të burgosurit palestinezë lirohen.”
Izraeli shtyn për një periudhë të pacaktuar lirimin e 620 të burgosurve palestinezë. Tel Avivi thotë se e ka marrë këtë vendim në përgjigje të “ceremonisë poshtëruese për dorëzimin e pengjeve izraelite”. Ky veprim mund ta bëjë procesin e armëpushimit të ballafaqohet me sfida serioze.
Hamasi liroi të shtunën 6 të burgosur sionistë, siç ishte planifikuar, ndërsa regjimi sionist duhej të lironte më shumë se 600 të burgosur palestinezë në raundin e shtatë të shkëmbimit të të burgosurve bazuar në marrëveshjen e armëpushimit.
Por sipas asaj që bëri të ditur kryeministri izraelit Benjamin Netanyahu të shtunën mbrëma, ky regjim vendosi të shtyjë lirimin e të burgosurve palestinezë derisa të garantohet lirimi i të burgosurve sionistë pa mbajtur një ceremoni të cilën Tel Avivi e konsideron “poshtëruese”.
Kështu, negociatat e ardhshme mes palestinezëve dhe palës sioniste, me praninë e ndërmjetësve ndërkombëtarë, përfshirë Katarin dhe Egjiptin, për zbatimin e fazës së dytë të armëpushimit në Gaza, janë pezulluar./parstoday
