Presidenti palestinez, Mahmoud Abbas, ka deklaruar se çdo lëvizje nga forcat pushtuese izraelite për të ndarë Gazën në dy seksione është e papranueshme dhe ka theksuar se enklava është një pjesë integrale e Palestinës. Siç raporton agjencia palestineze e lajmeve ‘WAFA’, presidenti Abbas dje zhvilloi biseda të ndara telefonike me kryeministrin danez, Mark Rutte dhe kryeministrin australian, Anthony Albanese.
Gjatë bisedës me kryeministrin Rutte, presidenti Abbas tha se deklaratat e fundit të ushtrisë izraelite se forcat e saj e kanë ndarë Gazën në dy pjesë pasi ajo kalon në një “fazë të rëndësishme” në luftën e saj kundër grupit palestinez Hamas janë të papranueshme. Ai theksoi se nuk ka zgjidhje të veçantë politike apo të sigurisë për Gazën pasi ajo është pjesë e pandashme e shtetit palestinez.
Të dielën, pasi trupat izraelite arritën në vijën bregdetare, zëdhënësi ushtarak i Izraelit, Daniel Hagari, tha se “sot është Gaza veriore dhe Gaza jugore”. Abbas theksoi domosdoshmërinë e zbatimit të një zgjidhjeje politikisht legjitime të bazuar në standardet ndërkombëtare për lirinë, pavarësinë dhe sovranitetin e popullit palestinez.
I kontaktuar nga kryeministri australian, Abbas theksoi nevojën e menjëhershme për të ndalur masakrën kundër popullit palestinez. Presidenti palestinez theksoi se ata janë përfaqësuesit ligjor të popullit palestinez dhe se e drejta për të marrë vendime kombëtare i është dhënë Organizatës për Çlirimin e Palestinës (PLO)./AA
