Një raport i Knessetit ka nxjerrë në pah numrin rekord të izraelitëve që e kanë braktisur vendin, me shumicën e emigrantëve të rinj dhe të arsimuar, sipas mediave vendase.
Të dhënat zyrtare tregojnë një “rritje të ndjeshme” të numrit të njerëzve që po largohen nga Izraeli, duke arritur nivele rekord vitet e fundit, ndërkohë që vetëm një pakicë e vogël është rikthyer, raportoi të hënën gazeta izraelite Maariv.
Sipas gazetës, një raport i posaçëm i Knessetit zbuloi se shumica e emigrantëve janë të rinj të arsimuar, të moshës 20 deri 39 vjeç, përfshirë edhe disa që më parë kishin imigruar në Izrael, por e kishin braktisur vendin pas një kohe të shkurtër.
Gjetjet u publikuan nga Qendra e Kërkimeve dhe Informacionit të Knessetit përpara një seance të Komisionit Parlamentar për Emigrim dhe Përshtatje, që do të mblidhet të hënën për të diskutuar trendin në rritje të emigrimit.
Raporti “paraqet një pamje shqetësuese të modeleve të emigrimit të Izraelit”, shkruan Maariv.
Sipas të dhënave të Zyrës Qendrore të Statistikave të Izraelit të cituara në raport, mesatarisht 36.000 izraelitë kanë lënë vendin çdo vit në periudhën 2009–2021.
Duke filluar nga viti 2022, emigrimi u rrit ndjeshëm, me 55.000 izraelitë që u larguan atë vit, një rritje prej 46 për qind krahasuar me 2021.
Shifra u rrit sërish në 2023, kur rreth 82.700 izraelitë u larguan nga vendi, duke shënuar një tjetër rritje prej 50 për qind.
Ndërkohë, numri i izraelitëve që janë kthyer pas qëndrimeve të gjata jashtë vendit ka mbetur i ulët, me rreth 24.000 kthime në vit, sipas raportit.
Rreth 40për qind e atyre që u larguan dhe 38 për qind e atyre që u kthyen në vitin 2022 ishin të moshës 20–39 vjeç, një përqindje më e lartë se pjesa e tyre në popullsinë e përgjithshme (27 për qind).
Gazeta thekson se kjo grupmoshë përfaqëson një demografi të re dhe shumë të punësueshme, dhe largimi i tyre mund të ketë pasoja afatgjata ekonomike.
Raporti regjistron gjithashtu një valë të re largimesh që nga tetori 2023, megjithëse pa dhënë hollësi të mëtejshme, shkruan Maariv.
Që nga tetori 2023, Izraeli ka zhvilluar një luftë gjenocidale kundër Rripit të Gazës, duke vrarë mbi 68.000 persona, kryesisht gra dhe fëmijë, dhe duke plagosur mbi 170.000 të tjerë, sipas Ministrisë së Shëndetësisë së Gazës./trtbalkan
