Sekretari amerikan i Shtetit, Antony Blinken, u takua me Princin e Kurorës dhe kryeministrin saudit, Mohammed bin Salman, transmeton Anadolu.
Zëdhënësi i Departamentit Amerikan të Shtetit, Matthew Miller, tha se në takimin e mbajtur në Jeddah, sekretari Blinken shprehu vlerësimin për lidershipin e Arabisë Saudite për organizimin e takimit ministror të koalicionit kundër DEASH-it dhe theksoi përpjekjet e përbashkëta për të luftuar terrorizmin.
“Të dy palët konfirmuan angazhimin e tyre të përbashkët për të avancuar stabilitetin, sigurinë dhe prosperitetin në të gjithë Lindjen e Mesme dhe më gjerë, duke përfshirë një marrëveshje gjithëpërfshirëse politike për të arritur paqen, prosperitetin dhe sigurinë në Jemen”, tha Miller, duke shtuar:
“Sekretari theksoi gjithashtu se marrëdhëniet tona dypalëshe forcohen nga përparimi në të drejtat e njeriut”.
Të dy liderët diskutuan gjithashtu për thellimin e bashkëpunimit ekonomik, veçanërisht në fushën e energjisë së pastër dhe teknologjisë.
Blinken falënderoi gjithashtu Princin e Kurorës për mbështetjen e Arabisë Saudite në evakuimin e qytetarëve amerikanë nga Sudani dhe për partneritetin e vazhdueshëm të Mbretërisë në negociatat diplomatike për të ndaluar luftimet atje.
Është paraparë që Blinken sot të marrë pjesë në një takim ministror me vendet e Këshillit të Bashkëpunimit të Gjirit (GCC) “për të diskutuar bashkëpunimin në rritje me partnerët tanë të GCC-së për të promovuar sigurinë, stabilitetin, de-eskalimin, integrimin rajonal dhe mundësitë ekonomike në të gjithë Lindjen e Mesme”.
Blinken dhe ministri i Jashtëm saudit Faisal bin Farhan do të bashkëorganizojnë një tjetër takim ministror nesër në kryeqytetin saudit Riad mbi koalicionin ndërkombëtar për të mposhtur organizatën terroriste DEASH.