Ministri i Mbrojtjes i Izraelit, Yoav Gallant, ka deklaruar se ushtria izraelite do të sulmojë të gjithë Qytetin e Gazës dhe pjesën veriore të Rripit të Gazës derisa e gjithë infrastruktura e Hamasit të shkatërrohet plotësisht. Ministria e Mbrojtjes lëshoi një deklaratë, ku citoi ministrin Gallant duke theksuar se ushtria do të qëndrojë në Gaza “derisa të eliminohet e gjithë infrastruktura e Hamasit”.
“Ky veprim që po ndodh tani, në veri të Rripit të Gazës, së shpejti do të çojë në shkatërrimin (e Hamasit në)… në të gjithë zonën e Qytetit të Gazës dhe në veri të Rripit të Gazës”, tha Gallant. Sipas deklaratës, shefi i mbrojtjes vëzhgoi nga kufiri izraelit qytetin e lagjeve Jabaliya dhe Shejaiya në pjesën veriore të Rripit të Gazës.
“Në të njëjtën kohë, ushtria ka filluar të punojë në jug të Rripit të Gazës. Ne do të vazhdojmë deri në fitore dhe derisa të arrihen të gjitha qëllimet, eliminimi i Hamasit dhe kthimi i pengjeve në Izrael”, tha ai. Izraeli nisi sulme të pamëshirshme ajrore dhe tokësore në Rripin e Gazës pas një sulmi ndërkufitar nga Hamasi më 7 tetor.
Numri i palestinezëve të vrarë nga sulmet izraelite në Rripin e Gazës që nga fillimi i konfliktit më 7 tetor është pothuajse 15.900. Numri i të plagosurve gjatë të njëjtës periudhë është rritur në të paktën 42 mijë. Ndërkohë, numri zyrtar i vdekjeve izraelite është 1.200./AA
