Mjeku Ilir Alimehmeti, ka diskutuar për skandalin që ka shpërthyer në spitalin Onkologjik, ku pacientët zhvateshin nga mjekët duke u referuar në klinika private, apo nuk u jepeshin ilaçet pa i paguar ato shtrenjtë në farmaci të lidhura me mjekët. Alimehmeti tha se sistemi korruptiv i ngritur në Shqipëri, lë hapësirë për këta mjekë dhe punonjës të shëndetësisë për të abuzuar.
“Ligji është i barabartë për të gjithë. Kur bëhet fjalë për jetën dhe shëndetin ka gjithmonë një sensitivitet, në veçanti kur bëhet fjalë për sëmundjen e kancerit. Kur ka një dosje dhe po hetojnë organet kompetente, do të merren ata.
Ju thatë, një skemë. Në fakt në këtë diskutim, shoh të paktën tre skema, tre elemente të bashkuar dhe të grupuar në një. E para ka të bëjë me elementin e spostimit të pacientëve nga sistemi publik në atë privat për kirurgji. Skema e dytë, spostimi i medikamenteve nga spitali në sistemin privat farmaceutik. E treta, mungesë pajisjesh apo rrezkimin nga këto lloj pajisjesh radioterapie brenda spitalit Onkologjik. Pra janë tre të ndryshme.
Në fund fare, diskutimi është i thjeshtë, gjithmonë do presim Prokurorinë dhe policinë? Këto skema, ka ndonjë detyrë Ministria e Shëndetësisë? Po të kesh mjaftueshëm kirurgë dhe mjekë nuk vonohet dot skema, ta çosh nga publiku në privat. Skemat e prenotimit të sallave janë shumë të thjeshta, janë elektronike, mund të monitorohen lehtë. Nëse ka mjaftueshëm terapi spitali për kimioterapi, nuk krijohet dot ajo skema që duhet ta blesh.
Nëse ka një plan dhe program monitorimi dhe vlerësimi, ai duhet trajtuar, minimizon shumë skemat e tilla. Kështuqë edhe nëse ka protokolle trajtimi, nuk vjen diskutimi si kjo, do ja heqim një pacienti dhe do t’ja japim një pacienti tjetër. Brenda kësaj mjegullnaje dhe këtij terreni, gjen oportunitete. Disa njerëz shkojnë dhe i shfrytëzojnë”, tha Alimehmeti. /tpz
