Udhëheqësi i Hamasit takohet me liderin suprem të Iranit: Izraeli dështoi në arritjen e qëllimeve të tij ushtarake

Gjatë vizitës së tij në Iran të martën (26 mars) udhëheqësi i Hamasit, Ismail Haniyeh, takoi Udhëheqësin Suprem të vendit, Ajatollah Ali Khamenei. Sipas agjencisë së lajmeve WANA, gjatë takimit Ajatollah Khamenei shprehu mbështetjen e Iranit për popullin palestinez në Gaza. Haniyeh u mirëprit më herët nga ministri i jashtëm i Iranit, Hossein Amirabdollahian, ku tha se Izraeli “kishte dështuar në arritjen e qëllimeve të tij ushtarake”.

Irani ka mbështetur Hamasin në luftën gati gjashtëmujore me Izraelin që ka vrarë më shumë se 32,000 palestinezë në Gaza, sipas autoriteteve shëndetësore në enklavën e drejtuar nga Hamasi.

Kjo është vizita e dytë e Haniyeh në Iran që nga shpërthimi i luftës më 7 tetor. Të hënën, Këshilli i Sigurimit i Kombeve të Bashkuara miratoi një rezolutë që kërkon një armëpushim të menjëhershëm midis Izraelit dhe Hamasit, pasi Shtetet e Bashkuara abstenuan nga votimi. Zëdhënësi i ministrisë së jashtme iraniane Nasser Kanaani e quajti rezolutën e së hënës një “hap pozitiv”. Hamasi përshëndeti rezolutën e OKB-së, por tha se armëpushimi duhej të ishte i përhershëm.

Izraeli kritikoi vendimin e Uashingtonit për të mos vendosur veton mbi masën, për të cilën Izraeli tha se nuk do të ndryshonte asgjë në terren./BW