Udhëheqësi iranian, Ali Khamenei, i përshkroi sulmet ndaj Kuranit në disa vende evropiane si “shembullin më injorant” të armiqësisë kundër Islamit.
Sipas agjencisë zyrtare të lajmeve të Iranit, IRNA, Khamenei foli në një takim të mbajtur në Teheran me rastin e ditëlindjes së profetit Muhamed, ku morën pjesë ambasadorë të disa vendeve islame.
Duke vënë në shënjestër Izraelin në një pjesë të fjalimit të tij, Khamenei tha: “Regjimi cionist është plot urrejtje jo vetëm kundër nesh, por edhe kundër vendeve të tjera, duke përfshirë Egjiptin, Irakun dhe Sirinë. Sepse ata nuk mund të arrinin qëllimet e tyre nga Nili deri në Eufrat”.
Pa përmendur emra, Khamenei theksoi vendet që po përgatiten të normalizojnë marrëdhëniet e tyre me Izraelin dhe tha: “Qeveritë që luajnë bixhoz për normalizimin me regjimin sionist do të humbasin. Ata po bëjnë gabim. Siç thonë evropianët, ata po vënë bast mbi kalin që do të humbasë”.
Duke iu referuar sulmeve kundër Kuranit të Shenjtë në disa vende evropiane, Khamenei tha: “Sot, armiqësia ndaj Islamit është bërë më e hapur se kurrë. Një shembull injorant i kësaj është fyerja ndaj Kuranit të Shenjtë e bërë nga një budalla injorant dhe e mbështetur nga një qeveri. Ata mendojnë se mund ta dobësojnë Kuranin, por e kanë gabim. Ata thjesht po shkatërrojnë veten”.
Marrëveshjet e normalizimit të Izraelit me vendet arabe
Izraeli, i cili normalizoi marrëdhëniet me Egjiptin në 1979 dhe Jordaninë në 1994, hyri në një proces të ri normalizimi me vendet arabe në vitin 2020.
Në këtë proces, të quajtur “Marrëveshjet e Abrahamit”, Izraeli vendosi marrëdhënie diplomatike me Emiratet e Bashkuara Arabe, Bahreinin, Sudanin dhe Marokun.
Princi i kurorës i Arabisë Saudite, Mohammed bin Salman, në një intervistë të fundit me televizionin Fox, tha se “po afrohen çdo ditë më shumë” me një marrëveshje normalizimi me Izraelin. Kryeministri izraelit Benjamin Netanyahu deklaroi në fjalimin e tij në Asamblenë e Përgjithshme të Kombeve të Bashkuara (OKB) se “janë në prag të një marrëveshjeje historike me Arabinë Saudite”.
Administrata amerikane po ndërmjetëson bisedimet mes dy vendeve./AA
