Franca ka dënuar miratimin nga Izraeli të njësive shtesë të vendbanimeve në Bregun Perëndimor të pushtuar. Ministria e Punëve të Jashtme e Francës kujtoi se Izraeli miratoi ndërtimin e 3.500 njësive të reja në vendbanimet e Bregut Perëndimor. “Franca i bën thirrje qeverisë izraelite që të kthejë menjëherë këtë vendim të papranueshëm, të paligjshëm dhe të papërgjegjshëm, në dritën e tensioneve tashmë jashtëzakonisht të larta në Bregun Perëndimor dhe para periudhës së ndjeshme të ditëve të shenjta”, tha ministria franceze.
Më tej, ministria theksoi se vendbanimet izraelite në territoret palestineze janë në kundërshtim me ligjin ndërkombëtar dhe duhet të ndalen. “Franca dënon të gjithë hapat e njëanshme që minojnë perspektivën për një zgjidhje me dy shtete, e cila është e vetmja mënyrë që përmbush të drejtën e Izraelit për siguri dhe aspiratat legjitime të palestinezëve”, theksohet në njoftim, duke kujtuar se Franca vendosi sanksione ndaj kolonëve izraelitë të dhunshëm dhe ekstremistë në Bregun Perëndimor.
Izraeli vazhdon ofensivën ushtarake në Rripin e Gazës në hakmarrje të një sulmi të 7 tetorit nga Hamasi kur Tel Avivi thotë se u vranë rreth 1.200 njerëz. Të paktën 30.800 palestinezë janë vrarë që atëherë në Gaza dhe rreth 73 mijë të tjerë janë plagosur në mes të shkatërrimit të gjerë në enklavën bregdetare. Në një vendim të përkohshëm në muajin janar, Gjykata Ndërkombëtare e Drejtësisë urdhëroi Izraelit të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza.
Armiqësitë kanë vazhduar në mënyrë të pandërprerë, megjithatë edhe dërgesat e ndihmave mbeten mjerisht të pamjaftueshme për të përballuar katastrofën humanitare në Gaza./AA
