Hamasi ka deklaruar se propozimi për armëpushim i paraqitur nga administrata e presidentit amerikan Donald Trump është “ende në diskutim”, por në formën aktuale do të çojë vetëm në “vazhdimin e vrasjeve dhe urisë” në Gaza.
Zëdhënësja e Shtëpisë së Bardhë, Karoline Leavitt, tha se Izraeli ka pranuar marrëveshjen dhe se i dërguari i posaçëm amerikan për Lindjen e Mesme, Steve Witkoff, ia ka dorëzuar propozimin Hamasit për shqyrtim.
Përfaqësuesi i Hamasit, Basem Naim, deklaroi për Reuters se propozimi “nuk përmbush asnjë nga kërkesat e popullit tonë, përfshirë ndalimin e luftës”. Megjithatë, ai tha se udhëheqja e Hamasit po e shqyrton me “përgjegjësi kombëtare”.
Sipas Reuters, një tjetër zyrtar i Hamasit, Sami Abu Zuhri, theksoi se propozimi nuk përfshin ndonjë angazhim nga Izraeli për të përfunduar luftën, për të tërhequr trupat nga Gaza apo për të lejuar ndihmën humanitare të hyjë lirshëm.
Ndërkohë, qeveria izraelite nuk ka konfirmuar publikisht miratimin e këtij propozimi. Mediat izraelite raportojnë se kryeministri Netanyahu u ka thënë familjarëve të pengjeve në Gaza se është i gatshëm të ecë përpara me propozimin e përkohshëm të Witkoff.
Analisti izraelit Akiva Eldar tha për Al Jazeera se është “e pazakontë” që Izraeli ta pranojë i pari një marrëveshje dhe sugjeroi se Netanyahu mund të po përpiqet ta paraqesë Hamasin si “fajtorin”, nëse marrëveshja dështon.
Më herët këtë javë, kishte raporte kontradiktore ku Hamasi pretendonte se kishte arritur një marrëveshje kornizë me Witkoff për një armëpushim të përhershëm dhe tërheqje të plotë të forcave izraelite nga Gaza. Megjithatë, Witkoff dhe zyrtarë amerikanë i mohuan këto pretendime, duke i quajtur “të papranueshme” dhe “propagandë”.
Që nga përfundimi i armëpushimit të përkohshëm më 18 mars, Izraeli ka rifilluar ofensivën e tij në Gaza, duke shkaktuar afro 4,000 viktima të reja dhe duke e çuar numrin total të të vrarëve në mbi 54,000, sipas autoriteteve shëndetësore në Gaza.
Ndërkohë, bllokada izraelite ndaj ndihmës humanitare vazhdon, duke shtyrë popullsinë drejt urisë ekstreme, sipas OKB-së. Edhe pse më 19 maj Izraeli lejoi një pjesë të ndihmave të hyjnë, Sekretari i Përgjithshëm i OKB-së, Antonio Guterres, tha se kjo ishte vetëm “një lugë çaji” nga sa nevojitet. /mesazhi
