Irani ka rënë dakord për një armëpushim me Izraelin, pasi sipas Këshillit Suprem të Sigurisë Kombëtare të Iranit, objektivat ushtarake të Teheranit janë arritur. Presidenti amerikan Donald Trump njoftoi më herët se do të ketë një armëpushim pas gati dy javësh goditjesh të ndërsjella. Trump tha se Izraeli dhe Irani iu afruan atij “pothuajse njëkohësisht dhe thanë: ‘PAQE!’”, duke shtuar se Lindja e Mesme dhe e gjithë bota do të jenë “fituese” nga ndalimi i luftimeve.
Trupi më i lartë i sigurisë në Iran shpalli të martën “vendimin kombëtar për të imponuar ndërprerjen e luftës ndaj armikut sionist [Izraelit] dhe mbështetësve të tij të poshtër”. Ushtria iraniane, “pa asnjë besim ndaj fjalëve të armikut dhe me duart në këmbëz”, është gati të japë një “përgjigje vendimtare dhe penguese ndaj çdo akti shkeljeje nga armiku”, paralajmëroi deklarata.
Teherani deklaroi se ka dhënë një “përgjigje poshtëruese dhe shembullore ndaj mizorisë së armikut”, përfshirë një sulm me raketa ndaj bazës amerikane në Katar të hënën, si dhe valën më të fundit të goditjeve ndaj Izraelit. “Sakrifikimi dhe guximi” i ushtrisë iraniane “e detyroi armikun të pendohet dhe të pranojë disfatën, duke i dhënë fund në mënyrë të njëanshme agresionit të tij”, thuhet më tej në deklaratë.
Pak orë më parë, edhe Izraeli e konfirmoi zyrtarisht pranimin e armëpushimit.
Zyra e kryeministrit Benjamin Netanyahu tha se Izraeli do të “përgjigjet me forcë ndaj çdo shkeljeje të armëpushimit”.
Në deklaratë u falënderua presidenti Trump dhe ushtria amerikane, e cila goditi objektiva në Iran të dielën, për “mbështetjen e tyre në mbrojtje dhe për pjesëmarrjen në eliminimin e kërcënimit bërthamor iranian”.
Po ashtu, zyra e Netanyahu-t bëri të ditur se ai mbajti një mbledhje kabineti për të raportuar se “Izraeli ka eliminuar një kërcënim ekzistencial të dyfishtë të menjëhershëm – si në fushën bërthamore, ashtu edhe në atë të raketave balistike – që vinte nga Irani”.
Moska ka përshëndetur armëpushimin mes Izraelit dhe Iranit dhe shpreson që ai të jetë “i qëndrueshëm”, ka deklaruar zëdhënësi i Kremlinit, Dmitry Peskov. “Ky është pikërisht qëndrimi që Rusia ka mbajtur që në fillim të këtij konflikti. Prandaj, po, kjo mund dhe duhet të përshëndetet,” u shpreh Peskov për gazetarët./gazetaimpakt/rt
