Pheniani po kërkon të zgjerojë arsenalin e tij me “mjete speciale” jo-bërthamore
Koreja e Veriut ka kryer një seri testesh të armëve të avancuara teknologjikisht, ndërsa kërkon të zgjerojë arsenalin e saj me armë elektromagnetike, bomba me fibër karboni dhe sisteme të reja të lëvizshme të mbrojtjes ajrore, raportoi agjencia shtetërore e lajmeve KCNA.
Testet u zhvilluan gjatë tre ditëve. Kim Jong-sik, një gjeneral që mbikëqyri testet, i përshkroi sistemin elektromagnetik dhe bombat me fibër karboni si “mjete speciale” në arsenalin e vendit, por dha pak detaje mbi natyrën e armëve të reja.
Ushtria e Koresë së Jugut tha se zbuloi disa lëshime raketash nga territori i Koresë së Veriut. Projektilët fluturuan nga 240 deri në 700 km, sipas Reuters.
Bombat “blackout” me fibër karboni janë projektuar për të shpërndarë fije përçuese të mbushura me grafit mbi rrjetet elektrike dhe centralet për të shkaktuar qarqe të shkurtra. Arma elektromagnetike me puls (EMP), jo-bërthamore, është një tjetër lloj pajisjeje e krijuar në mënyrë të ngjashme për të neutralizuar qarket elektronike në asetet ushtarake si sistemet e radarit dhe avionët. Sipas KCNA, testet përfshinin gjithashtu një kokë të re luftarake me shpërndarje (cluster) për Hwasong-11, një raketë balistike e aftë për të mbajtur ngarkesë bërthamore.
Testet u zhvilluan në një kohë tensionesh në rritje në Gadishullin Korean. Zëvendësministri i Parë i Punëve të Jashtme, Jang Kum-chol, e përshkroi Korenë e Jugut si “shtetin armik më armiqësor” në një deklaratë të martën.
Më herët këtë javë, Seuli kërkoi falje ndaj Phenianit për hyrje të dronëve, duke mohuar çdo përfshirje zyrtare dhe duke pretenduar se lëshimet ishin një nismë private. Tre persona – përfshirë një punonjës të Shërbimit Kombëtar të Inteligjencës, një oficer ushtarak të Koresë së Jugut dhe një student pasuniversitar – përballen me akuza.
Marrëdhëniet kanë qenë praktikisht të ngrira që nga viti 2019, pas dështimit të bisedimeve bërthamore mes Phenianit dhe Uashingtonit. Negociatat u nisën nga presidenti amerikan Donald Trump gjatë mandatit të tij të parë.
Udhëheqësi i Koresë së Veriut, Kim Jong-un, deklaroi muajin e kaluar se një arsenal bërthamor i aftë për të përbërë një kërcënim të besueshëm ndaj SHBA-së është i vetmi mjet presioni kundër “terrorizmit dhe agresionit” amerikan. Ai gjithashtu tha se Koreja e Veriut nuk do të heqë dorë nga armët e saj bërthamore dhe do të kundërshtojë çdo përpjekje për të sfiduar statusin e saj./rt.com
