Ligjvënësi francez i opozitës, Thomas Portes, ka denoncuar Izraelin për “gjenocid të mbrojtur nga Bashkimi Evropian (BE) dhe SHBA-ja” dhe u ka bërë thirrje njerëzve të bojkotojnë kompanitë që mbështesin Izraelin dhe sulmet e tij në Rripin e Gazës.
Portes, një anëtar i Partisë së Majtë të Francës së Papërkulur (LFI), theksoi rritjen e viktimave civile dhe krizën humanitare në Gaza për shkak të sulmeve të Izraelit dhe bëri thirrje për një bojkot të kompanive që mbështesin Izraelin. Portes, një figurë e shquar e LFI-së, i cili njihet për mbështetjen e tij për Gazën në Francë, ndau një poster në llogarinë e tij në X me logot e kompanive që duhet bojkotuar.
Postimi përmbante logo të shumta, përfshirë ato të një marke të njohur këpucësh sportive, supermarkete dhe kompani sigurimesh, së bashku me slogane të tilla si “Bojkoto aparteidin Izraelin”, “T’i japim fund dëbimeve të detyruara të palestinezëve” dhe “E drejta e kthimit është për palestinezët”. “Natë e re tmerri në Rripin e Gazës. Nata e re e vdekjes për fëmijët palestinezë. Kriminelët izraelitë të luftës vazhdojnë gjenocidin e tyre të mbrojtur nga BE-ja dhe SHBA-ja”, shkroi Portes.
Izraeli ka zhvilluar një ofensivë vdekjeprurëse ushtarake në Rripin e Gazës që nga sulmi ndërkufitar i 7 tetorit i udhëhequr nga Hamasi, në të cilin sipas Tel Avivit u vranë afër 1.200 njerëz. Më shumë se 31.600 palestinezë, kryesisht gra dhe fëmijë, janë vrarë në Gaza dhe të paktën 73.676 të tjerë janë plagosur në mes të shkatërrimit në masë dhe mungesës së nevojave themelore.
Sipas Kombeve të Bashkuara (OKB), lufta izraelite ka çuar në zhvendosjen e brendshme të 85 për qind të popullsisë së Gazës mes një bllokade të shumicës së ushqimeve, ujit të pastër dhe ilaçeve. Po ashtu 60 për qind e infrastrukturës së enklavës është dëmtuar ose shkatërruar. Izraeli akuzohet për gjenocid në Gjykatën Ndërkombëtare të Drejtësisë, e cila në një vendim të përkohshëm në muajin janar urdhëroi Tel Avivin të sigurojë që forcat e tij të mos kryejnë akte gjenocidi dhe të garantojë që ndihma humanitare të ofrohet për civilët në Gaza./AA
