Ms Rachel u bën thirrje celebriteteve të pasur të mbështesin fëmijët palestinezë, ndërsa gjithnjë e më shumë artistë po përdorin platformat e tyre për të mbledhur fonde dhe për të ngritur zërin për Gazën.
Ylli i YouTube, Ms Rachel, është zotuar të barazojë donacionin prej 1 milion dollarësh të reperit Macklemore për organizatat që mbështesin palestinezët, duke u bërë thirrje figurave të tjera publike të japin kontribute të ngjashme.
Macklemore, nga i cili u hoq e drejta për të hapur koncertet e turneut të Ed Sheeran pasi tha „Palestina e Lirë“ gjatë një performance në stadiumin MetLife të Nju Xhersit, deklaroi se do t’i dhurojë të gjitha fitimet e tij nga turneu i Sheeran për disa organizata që mbështesin popullin palestinez.
Ms Rachel, emri i plotë i së cilës është Rachel Accurso, e njoftoi donacionin e saj në Instagram, duke shkruar: „Më shumë se 20,000 fëmijë të çmuar palestinezë janë vrarë, dhe fëmijët vazhdojnë të vriten çdo ditë.“
Ms Rachel u bën thirrje celebriteteve të veprojnë
Accurso tha se kontributi i saj do t’i destinohet Fondit të Ndihmës për Fëmijët e Palestinës (Palestine Children’s Relief Fund).
„Ne kemi një detyrim moral të përdorim privilegjin dhe platformat tona për të mbrojtur fëmijët dhe të drejtat e njeriut,“ shkroi ajo.
Accurso, një animatore për fëmijë me më shumë se 21 milionë abonentë në YouTube, ka folur vazhdimisht për vështirësitë me të cilat përballen fëmijët në Gazë mes gjenocidit izraelit. Ajo i bëri thirrje „çdo celebriteti të pasur të bardhë“ të barazojë donacionin e saj.
Njoftimi i saj e bën atë figurën më të fundit publike që mbështet Macklemore, i cili u hoq nga turneu „Loop“ i Sheeran për shkak të mbështetjes së tij për Palestinën.
„Palestina e lirë! Dua që këto fjalë të dëgjohen fuqishëm dhe qartë, në mënyrë që njerëzit nga Gaza e deri në Bregun Perëndimor të okupuar ta dinë se ne nuk i kemi harruar ata,“ tha Macklemore gjatë një fjalimi dyminutësh.
Macklemore përballet me kritika për deklaratat mbi Palestinën
Komentet e tij nxitën një valë kritikash nga lobet izraelite. Këngëtarja Pink kërkoi që Macklemore të hiqej nga turneu, duke kujtuar një incident të vitit 2014 ku ai mbante një kostum që u kritikua se „ngjante me një karikaturë çifute“. Macklemore kërkoi falje për kostumin në atë kohë.
Më vonë, Pink e sqaroi pozicionin e saj në një postim në Instagram, duke pretenduar se nuk po fliste në emër të qeverisë izraelite, por po mbronte „pjesëmarrësit çifutë në koncert që mund të jenë shqetësuar nga deklaratat e Macklemore“.
Macklemore iu drejtua anëtarëve çifutë të audiencës gjatë një date tjetër të turneut më 5 shtator, duke thënë: „Kritika ndaj Izraelit, kritika ndaj apartheidit, të qenit kundër gjenocidit në asnjë mënyrë nuk është kritikë ndaj jush. Mesazhi im është për paqe, dashuri; që të gjithë qeniet njerëzore të trajtohen me dinjitet, respekt dhe barazi.“
Sheeran pretendon se vendimi u mor nga pronarët e stadiumeve
Sheeran ka vazhduar të pretendojë se largimi i Macklemore u udhëhoq nga pronarët e stadiumeve, përfshirë pronarin e Gillette Stadium dhe New England Patriots, Robert Kraft.
Të martën, Sheeran shkroi në Instagram: „Unë i kam pikëpamjet e mia personale për këtë konflikt shkatërrues. Vetëm pse zgjedh të mos flas publikisht, nuk do të thotë se nuk i kam ato, dhe nuk do të thotë se nuk më bëhet vonë. E as nuk do të thotë se nuk i mbështes çështjet në mënyrën time personale.“
Kraft dhe Sheeran po dhurojnë secili nga 2 milionë dollarë për „ndihmë në rajon“, tha Kraft të mërkurën, megjithëse organizatat që do t’i marrin këto para nuk janë identifikuar ende.
Vlen të theksohet se katër nga artistët mbështetës, përfshirë këngëtarin amerikan Finneas dhe grupin pop danez Lukas Graham, janë tërhequr nga turneu në shenjë solidariteti me Macklemore.
Numri në rritje i artistëve që flasin hapur për Palestinën sinjalizon një refuzim gjithnjë e më të madh për të heshtur ndërsa shkatërrimi në Gazë vazhdon. Nga dhurimet për organizatat palestineze e deri te braktisja e turneve të mëdha në shenjë solidariteti me Macklemore, muzikantët dhe figurat publike po përdorin gjithnjë e më shumë platformat e tyre për të sfiduar heshtjen dhe për të mbajtur vuajtjen e palestinezëve në qendër të vëmendjes globale./mayadeen
