Kryeministri izraelit Benjamin Netanyahu tha të dielën se ai kundërshton çdo marrëveshje të përkohshme që thuhet se po negociohet mes SHBA-së dhe Iranit për programin e tij bërthamor.
Netanyahu foli pasi raportet në mediat izraelite thanë se po arrihet mirëkuptim midis Uashingtonit dhe Teheranit që do të kërkonin të frenonin disi programin bërthamor të Iranit, në këmbim të lehtësimit të sanksioneve. Raportet nuk mund të konfirmoheshin në mënyrë të pavarur dhe SHBA-ja e ka mohuar publikisht çdo marrëveshje të tillë.
Netanyahu tha se Izraeli kishte informuar SHBA-në se “mirëkuptimet më të kufizuara, ato që quhen “mini-marrëveshje”, sipas mendimit tonë, nuk i shërbejnë qëllimit dhe ne jemi gjithashtu kundër tyre”.
Zyrtarët izraelitë besojnë se tashmë janë arritur disa mirëkuptime për kufizimin e pasurimit dhe se disa fonde tashmë janë shkrirë. Zyrtarët folën në kushte anonimiteti sepse po diskutonin një vlerësim diplomatik konfidencial.
Faqja e lajmeve izraelite Walla javën e kaluar raportoi se sipas marrëveshjeve në zhvillim, Irani do të kufizonte pasurimin e uraniumit në 60% në këmbim të lehtësimit të sanksioneve. Faqja tha gjithashtu se palët po diskutonin për lirimin reciprok të të burgosurve.
Zëdhënësi i Departamentit të Shtetit, Matthew Miller tha javën e kaluar “nuk ka asnjë marrëveshje”, duke shtuar se raportet ishin të pavërteta.
Në raportin e saj, Walla tha se Netanyahu kishte zbuluar detaje të marrëveshjes në një takim të fundit të komitetit parlamentar. Shtetet e Bashkuara dhe Izraeli ndajnë inteligjencën se bashku dhe fokusi kryesor i ndërveprimeve të vendeve është Irani dhe programi i tij bërthamor.
Netanyahu kundërshtoi me forcë marrëveshjen e vitit 2015 midis Iranit dhe fuqive botërore të ndërmjetësuar nga administrata e Obamës, e cila u përpoq të frenonte programin bërthamor të Iranit. Ai ishte një mbështetës kryesor i vendimit të Presidentit të atëhershëm Donald Trump në vitin 2018 për t’u tërhequr nga marrëveshja, gjë që e la atë në rrëmujë.
Irani thotë se programi i tij është menduar për qëllime civile. Izraeli e konsideron Iranin bërthamor si një kërcënim të madh, duke përmendur thirrjet e tij për shkatërrimin e Izraelit dhe mbështetjen e tij për grupet militante anti-izraelite në të gjithë rajonin.
Izraeli thotë se nuk përjashton veprimet ushtarake për të penguar Iranin të prodhojë një armë bërthamore.VOA/GazetaImpakt
