“Ky është një moment për paqe dhe ripërtëritje në Lindjen e Mesme”, tha Presidentja e Parlamentit Evropian, Roberta Metsola.
Presidentja e Parlamentit Evropian, Roberta Metsola, të premten bëri thirrje që plani për armëpushim në Gaza të “respektohet” dhe të “zbatohet plotësisht”.
“Ky është një moment për paqe dhe ripërtëritje në Lindjen e Mesme. Ai hap një rrugë që mund të përfundojë më në fund ciklin ndërbreznor të dhunës, vuajtjeve dhe terrorit që ka pllakosur rajonin. Ai duhet të respektohet dhe të zbatohet plotësisht,” tha Metsola gjatë Konferencës së Rigës, të mbajtur në Letoni.
Metsola gjithashtu përsëriti se ata e mirëpresin marrëveshjen.
Qeveria izraelite ka miratuar një marrëveshje për t’i dhënë fund luftës në Gaza dhe për të shkëmbyer të burgosur me fraksionet palestineze, thuhet në një deklaratë të Zyrës së Kryeministrit izraelit të bërë publike herët të premten.
Sipas mediave izraelite, armëpushimi hyri në fuqi menjëherë pas miratimit nga Izraeli.
Më 29 shtator, Trump shpalli një plan armëpushimi me 20 pika për Gazën, që përfshin lirimin e të gjithë pengjeve izraelite në këmbim të rreth 2.000 të burgosurve palestinezë, një armëpushim të përhershëm dhe një tërheqje graduale të forcave izraelite nga i gjithë Rripi i Gazës.
Faza e dytë e planit parashikon krijimin e një mekanizmi të ri qeverisës në Gaza pa pjesëmarrjen e grupit palestinez Hamas, formimin e një force sigurie të përbërë nga palestinezë dhe trupa nga vendet arabe dhe islame, si dhe çarmatosjen e Hamasit. Ai gjithashtu përcakton financim arab dhe islam për administratën e re dhe rindërtimin e Rripit, me pjesëmarrje të kufizuar të Autoritetit Palestinez.
Vendet arabe dhe myslimane në përgjithësi e kanë mirëpritur planin, por disa zyrtarë kanë thënë se shumë nga detajet e tij kërkojnë diskutim dhe negociata për t’u zbatuar plotësisht.
Që nga tetori i vitit 2023, sulmet izraelite kanë vrarë pothuajse 67.200 palestinezë në enklavë, shumica gra dhe fëmijë, duke e bërë atë të pabanueshme./trtbalkan
