Presidenti izraelit, Isaac Herzog, ka deklaruar se nuk do të ketë fitore në luftën izraelite në Rripin e Gazës pa kthimin e izraelitëve të mbajtur robër nga Hamasi. “Ne jemi vendosur ta fitojmë këtë betejë dhe është e qartë për ne pa asnjë dyshim se nuk ka fitore pa kthimin e robërve, civilëve dhe ushtarëve”, tha Herzog në një ceremoni të përkujtimore për ushtarët e rënë të Izraelit.
“Për shumë muaj tani, Shteti i Izraelit ka qenë në luftë. Një luftë që ne nuk e zgjodhëm, por nuk mund ta shmangim, të kthejmë të rrëmbyerit, të rivendosim sigurinë. Është detyra jonë të kthejmë të gjithë të rrëmbyerit, të luftojmë për jetën e tyre, të kthejmë eshtrat e mbetura në Gaza, përfshirë ato nga operacioni ‘Tehu mbrojtës’, për varrim në Izrael”, tha Herzog, duke iu referuar luftës izraelite në Gaza të vitit 2014.
Izraeli ka zhvilluar një ofensivë vdekjeprurëse ushtarake në Rripin e Gazës që nga sulmi ndërkufitar i 7 tetorit i udhëhequr nga Hamasi, në të cilin sipas Tel Avivit u vranë afër 1.200 njerëz. Më shumë se 31.600 palestinezë, kryesisht gra dhe fëmijë, janë vrarë në Gaza dhe të paktën 73.676 të tjerë janë plagosur në mes të shkatërrimit në masë dhe mungesës së nevojave themelore.
Izraeli refuzon të ndalojë luftën në Gaza deri në kthimin e mbi 130 pengjeve të mbajtura nga Hamasi që nga tetori i kaluar, ndërsa grupi palestinez kërkon fundin e ofensivës izraelite për çdo marrëveshje pengjesh me Tel Avivin. “Institucioni i sigurisë po operon pa pushim për të marrë çdo informacion që do të na ndihmojë të zbulojmë se çfarë ka ndodhur me të zhdukurit”, tha gjatë të njëjtës ceremoni ministri i Mbrojtjes, Yoav Gallant.
Sipas tij, ky angazhim për të mos lënë askënd pas është i vërtetë “për luftën që po luftojmë sot dhe për të gjitha luftërat e Izraelit”. Sipas Kombeve të Bashkuara (OKB), lufta izraelite ka çuar në zhvendosjen e brendshme të 85 për qind të popullsisë së Gazës mes një bllokade të shumicës së ushqimeve, ujit të pastër dhe ilaçeve. Po ashtu 60 për qind e infrastrukturës së enklavës është dëmtuar ose shkatërruar. Izraeli akuzohet për gjenocid në Gjykatën Ndërkombëtare të Drejtësisë, e cila në një vendim të përkohshëm në muajin janar urdhëroi Tel Avivin të sigurojë që forcat e tij të mos kryejnë akte gjenocidi dhe të garantojë që ndihma humanitare të ofrohet për civilët në Gaza./AA
