I pyetur se çfarë do të ndodhë në Iran pas vdekjes së Presidentit Raisi, Jazexhi tha:
“Asgjë nuk do të ndodhë. Ai nuk është Presidenti i parë i Iranit që është vrarë. Presidenti i parë është vrarë nga ajo organizatë që sot Shqipëria strehon. Është gjë e rëndë për popullin, sepse ishte figurë prominente, një hoxhë, që vinte nga Mashhad që është qendra e shkollës fetare të Iranit. Ishte njeri me potencë, i respektuar, dhe përflitej që mund të bëhej lideri suprem i vendit. Nëpër faqet muxhahedine që drejtohen nga Manza në Shqipëri, muxhahedinët sot kanë lëshuar një seri deklaratash, ku Komanda Supreme Muxhahedine është mëse e lumtur për vdekjen e Presidentit iranian. Deri në këto momente autoritetet iraniane janë duke e parë Shqipërinë dhe deklaratat e muxhahedinëve me shumë vëmendje. Politika në Iran do vazhdojë normalisht. Pas 50 ditëve në Iran do ketë zgjedhje për një President të ri. Në këto momente zv.Presidenti ka marrë postin, pra kemi një Presidencë kalimtare deri sa të zgjidhet një President i ri, në aspektin gjeo-strategjik nuk ndryshon gjë. Por ajo që ka ndodhur është një gjë e rëndë, autoritetet iraniane së bashku me ato ruse dhe turke, janë duke hetuar nëse ajo që i ndodhi Presidentit ishte aksident apo sulm terrorist. Sulmet terroriste kryhen nga Mossadi dhe koordinohen me muxhahedinët. Nga Shqipëria muxhahedinët kanë drejtuar vrasje të shkencëtarëve, politologëve iranianë. Komandatja Supreme e Muaxhahedinëve ka vite që kërkon për eliminimin ose arrestimin e Raisit. Janë bërë thirrje të hapura terroriste për vrasjen e Presidentit të Iranit, por s’e dimë ende nëse ka qenë aksident apo sulm terrorist. Azerbajxhani është një nga bazat kryesore të Mossad-it izraelit”./mcn
