Presidenti egjiptian Abdel Fattah el-Sisi thuhet se ka refuzuar kërkesat e shumta nga Shtetet e Bashkuara te Amerikes për të dërguar armë dhe pajisje ushtarake në Ukrainë.
Wall Street Journal me bazë në Nju Jork raportoi të premten se Sekretari i Mbrojtjes i SHBA-së Lloyd Austin mori një përgjigje “negative” në mars kur i kërkoi Sisit të dërgonte armë në Ukrainë.
E përditshmja amerikane tha se Uashingtoni i kishte kërkuar Kajros që t’i siguronte Kievit predha artilerie, raketa antitank, sisteme të mbrojtjes ajrore dhe armë të lehta, por zyrtarët egjiptianë privatisht thanë se nuk kishin ndërmend të dërgonin armë në Ukrainë.
Gazeta shtoi se që nga takimi i Austin me presidentin egjiptian, zyrtarë të lartë amerikanë kanë bërë kërkesa të shumta që Kajro ta zbatojë kërkesën amerikane, por pa dobi. Kundërshtimi i kërkesave të Uashingtonit vjen ndërsa disa dokumente të klasifikuara amerikane zbuluan në prill se Sisi fillimisht planifikoi të furnizonte Rusinë fshehurazi me 40,000 raketa dhe u tha zyrtarëve që ta mbanin të fshehtë marrëveshjen “për të shmangur problemet me Perëndimin”.
Një grup tjetër dokumentesh zbuloi se Egjipti më vonë u tërhoq nga dërgimi i armëve në Rusi nën presionin e SHBA-së dhe ra dakord të prodhonte municion artilerie për Ukrainën. Ndërsa përpiqet të qëndrojë neutral në luftën midis Rusisë dhe Ukrainës, Egjipti mban një marrëdhënie të ngushtë me Moskën dhe importon shumicën e grurit të tij nga Rusia. Pavarësisht se ka një marrëdhënie diplomatike dhe ushtarake të gjatë me Rusinë, Egjipti ka qenë gjithashtu për dekada partner i ngushtë i SHBA-së në Lindjen e Mesme dhe merr më shumë se 1 miliard dollarë në vit ndihmë ushtarake amerikane./Parstoday
