Dhjetëra njerëz dolën në protesta në kryeqytetin britanik Londër të enjten, duke protestuar kundër sulmeve izraelite në Gaza dhe bënë homazhe për të vrarët në sulmin ndaj Spitalit Baptist Al-Ahli.
Protesta e organizuar nga grupi aktivist hebre Na’amod në Sheshin e Parlamentit, kritikoi gjithashtu qeverinë britanike për heshtje ndaj asaj që po ndodh në Gaza.
Të mbledhurit brohoritën slogane si “Stop gjenocidit”, “Armëpushim i menjëhershëm” dhe “Lironi të gjithë pengjet”. Disa mbanin pankarta ku shkruhej “Hebrenjtë britanikë kërkojnë liri dhe barazi për të gjithë palestinezët”.
Duke lexuar një deklaratë në emër të grupit, Danny, i cili dha vetëm emrin e tij, tha se situata në Gaza po përkeqësohej çdo orë.
Ai iu referua edhe sulmit ajror izraelit të së martës në Spitalin Baptist Al-Ahli të Gazës, ku tha se skenat e tmerrshme të shkatërrimit kishin tronditur miliona njerëz në mbarë botën.
Duke thënë se ndajnë dhimbjen me ata që ende mbajnë zi për të vrarët në sulmin e 7 tetorit nga grupi palestinez Hamas në qytetet izraelite, ai shtoi se shpresojnë për kthimin e 200 qytetarëve izraelitë të rrëmbyer.
“Ne nuk mund të rrimë duarkryq ndërkohë që ushtria izraelite angazhohet në ndëshkimin kolektiv, duke vrarë mijëra dhe duke zhvendosur me forcë mbi një milion civilë palestinezë në Gaza para syve tanë. Ky është një krim kundër njerëzimit”, shtoi ai.
Duke kritikuar deklaratat e udhëheqjes izraelite për “vetëmbrojtjen”, ai tha se nuk kuptojnë “ndonjë kontekst në të cilin bombardimi i objektivave civilë mund të konsiderohet ndonjëherë proporcional ose i nevojshëm”.
Ai shtoi se asnjë palestinez nuk duhet të lidhet me “krimet e luftës të Hamasit”, ashtu si civilët e pafajshëm izraelitë nuk duhet të mbahen përgjegjës për “krimet e luftës të qeverisë së tyre”.
Yasmine Ahmed, drejtoresha e Human Rights Watch (HRW) në Mbretërinë e Bashkuar, dënoi sulmet e 7 tetorit, por shtoi se “asgjë nuk justifikon krimet e luftës”. “Asgjë nuk justifikon vrasjet pa dallim”, tha ajo.
Duke bërë thirrje për respektimin e detyrimeve ndërkombëtare, Ahmed tha se ushqimi, uji, karburanti dhe të gjitha nevojat themelore duhet të arrijnë në Gaza.
“A mund ta imagjinoni të shkoni në shtrat sonte (duke e ditur se) ju dhe familja juaj mund të mos mbijetoni? Edhe nëse jeni në ndërtesën e OKB-së dhe jeni duke kërkuar strehim, edhe nëse jeni në spital dhe po kërkoni për strehim, ju nuk jeni të sigurt në Gaza”, tha ajo.
Ajo shtoi se Parlamenti britanik dhe qeveria nuk kanë bërë “asgjë” për të parandaluar atë që po përballet populli i Gazës.
“Rishi Sunak (kryeministër i Britanisë së Madhe) dhe James Cleverly (ministër i Punëve të Jashtme), do të mbaheni mend në histori që nuk u ngritët dhe nuk i thatë Izraelit se ata nuk mund të ndëshkojnë kolektivisht të gjithë popullsinë. Do të kujtoheni për heshtjen dhe bashkëpunimin tuaj”, tha Ahmed.
Gaza po përjeton një krizë të rëndë humanitare pa energji elektrike, ndërsa uji, ushqimi, karburantet dhe furnizimet mjekësore po mbarojnë.
Konflikti në Gaza, i cili ka qenë nën bombardimet izraelite dhe një bllokadë që nga 7 tetori, filloi kur grupi palestinez Hamas nisi operacionin “Tufani i Al-Aksasë”, një sulm i papritur i shumëdimensional që përfshinte lëshimin e një breshërie raketash dhe infiltrimesh në Izrael nga toka, deti dhe ajri.
Si kundërpërgjigje, ushtria izraelite nisi operacione kundër objektivave të Hamasit brenda Rripit të Gazës.
Të paktën 3.785 palestinezë u vranë në sulmet izraelite në Gaza, dhe 1.400 izraelitë janë vrarë që nga përshkallëzimi i luftimeve./AA
