Të paktën 16 palestinezë u vranë dhe shumë u plagosën në sulmet e ushtrisë izraelite në Rripin e Gazës gjatë natës.
Sulmet ajrore, detare dhe tokësore të ushtrisë izraelite kundër Rripit të Gazës vazhdojnë në ditën e 287-të. Në lajmet e agjencisë zyrtare palestineze WAFA, thuhet se Izraeli bombardoi shtëpinë e familjes palestineze Abu Shekyan në kampin e refugjatëve Nuseirat në pjesën qendrore të Rripit të Gazës.
Në shtëpinë e bombarduar nga ushtria izraelite humbën jetën 8 palestinezë, përfshirë edhe fëmijë. Gjithashtu është goditur edhe shtëpia e familjes Abu Husayn në kampin e refugjatëve Al-Burajj në pjesën qendrore të Gazës. Të paktën 6 civilë u vranë dhe shumë të tjerë u plagosën në shtëpi. Një sulm ajror është kryer në një shkollë ku civilët ishin strehuar në qytetin e Gazës. Në sulmin në fjalë humbën jetën 2 civilë. Izraeli ka vazhduar të bombardojë me artileri lagjen Tel el-Heva në qytetin e Gazës.
Ushtria izraelite ka shënjestruar vendbanimet civile edhe në qytetet Khan Younis dhe Rafah, në jug të Rripit të Gazës, gjatë natës. Shumë të plagosur nga rajoni Shakush në perëndim të Rafahut u dërguan në Spitalin e Kuvajtit. Në sulmet e Izraelit në Rripin e Gazës që nga 7 tetori janë vrarë 38.848 palestinezë, përfshirë të paktën 16.172 fëmijë dhe 10.798 gra ndërsa 89.459 persona u plagosën./AA