Akademia Suedeze që organizon Çmimin Nobel për Letërsi, njoftoi të premten se nuk do të ketë çmim të tillë për vitin 2018, si pasojë e pretendimeve për abuzime seksuale që shkaktuan trazira në mesin e anëtarëve të Akademisë, duke hedhur kështu një hije të rëndë mbi çmimin prestigjioz vjetor.
Sekretari i përhershëm i grupit, Anders Olsson, tha: “E shohim të nevojshme të kthejmë besimin e publikut në Akademi para se laureati i ardhshëm të shpallet.”
Ai shtoi se ky institucion kulturor gjithashtu ka marrë vendim për të shtyrë çmimin e vitit 2018 “nga respekti për laureatët e mëparshëm dhe të ardhshëm letërsisë, Fondacioni Nobel dhe publiku i gjerë.”
Akademia tha se kishte për qëllim dhënien e çmimit të letërsisë për vitin 2018 – në vitin 2019.
Fondacioni i Çmimit Nobel që menaxhon mjetet për serinë e Çmimeve Nobel, tha se mbështeti vendimin për këtë shtyrje.
“Kriza në Akademinë Suedeze ka ndikuar negativisht në Çmimin Nobel”, ka thënë Carl-Hendrik Heldin, president i bordit të fondacionit.
Vendimi i Akademisë “nënvizon seriozitetin e situatës dhe do të ndihmojë të mbrojë reputacionin afatgjatë të Çmimit. Asnjë ndikim nuk do të ketë në dhënien e çmimeve Nobel në kategoritë tjera të vitit 2018”, shtoi ai.
Akademia Suedeze theksoi se nuk është hera e parë që ka vendosur të bëjë këtë shtyrje: grupi shpalli “Çmimin rezervuar” më 1915, 1919, 1925, 1926, 1927, 1936 dhe 1949. Pesë nga këto shpërblime u shtynë të jepen në të njëjtën kohë në vitin e ardhshëm.