Ndryshe nga Shtetet e Bashkuara, të cilat po promovojnë luftën në rajon përmes mbështetjes së tyre për Izraelin, Republika Islamike është “shtylla dhe spiranca e stabilitetit” në rajon, tha zëdhënësi i Ministrisë së Jashtme të Iranit.
Në një postim në rrjetin X të martën, Naser Kanani përmendi pritjen nga Teherani të takimit të dytë të platformës rajonale 3+3, të quajtur Koha për Paqe, Bashkëpunim dhe Progres në Kaukazin e Jugut, si një shembull i përpjekjeve të Iranit drejt sigurisë kolektive në rajon.
“Ndërsa Shtetet e Bashkuara dhe disa nga aleatët e tyre po përshkallëzojnë luftën, paqëndrueshmërinë dhe pasigurinë në rajon duke i dhënë mbështetje të palëkundur regjimit kriminel sionist, Teherani ishte mikpritës i takimit të dytë të platformës rajonale 3+3”, shkroi ai.
“Irani mbetet shtylla dhe spiranca e stabilitetit dhe sigurisë në rajon mbi bazën e doktrinës së sigurisë kolektive vendase.”
Kanani vuri në dukje gjithashtu se Irani beson se vendet e rajonit kanë fuqinë për të zgjidhur problemet e tyre dhe për të garantuar siguri dhe stabilitet të qëndrueshëm në përputhje me interesat e përbashkëta dhe përparimin kolektiv.
“Një strategji e tillë mund të çojë në më shumë përfitime dhe zhvillim të qëndrueshëm për rajonin tonë vetëm kur të gjitha vendet tona ndjekin një qasje të ngjashme pa ndërhyrjen dëmtuese të lojtarëve ndërrajonalë,” shtoi ai.
Platforma konsultative 3+3, që përfshin tre vendet e Kaukazit Jugor, Armeninë, Gjeorgjinë dhe Azerbajxhanin plus Rusinë, Turqinë dhe Iranin, u krijua në një përpjekje për të zgjidhur çështjet rajonale pa ndërhyrje të huaj./Parstoday
