Duke nisur nga e hëna e 18 dhjetorit do të nisin seancat publike me subjektet e vlerësimit kalimtar, të cilat që pas ndryshimeve të fundit ligjore, kryhen nga Trupa e Vlerësimit që është ngritur pranë Agjencisë së Mbikëqyrjes Policore.
Policia e Shtetit ka bërë me dije se janë 3 drejtues të lartë të Policisë dhe AMP që do të përballen me gjetjet e Trupës Vlerësuese.
Seancat publike do të mbahen në sallën e konferencave të Ministrisë së Brendshme dhe janë të hapura për publikun e median.
Kështu në sitë do të kalojnë vetëm ata që synojnë poste drejtuesish ose funksione me risk të lartë korruptimi si policia në Gardën e Republikës dhe në Agjencinë e Mbikëqyrjes Policore.
Kontrollit do t’i nënshtrohet drejtori dhe zëvendësdrejtorët e përgjithshëm, drejtorët e departamenteve, të Drejtorisë Qendrore, të strukturave të veçanta, drejtorët e zëvendësdrejtorët vendor, në drejtoritë e kufirit dhe migracionit, shefat e komisariateve, të sektorëve në nivel qendror e vendor që mbulojnë fushën e krimit të organizuar, krimit ekonomik/financiar dhe policisë rrugore
Por krahas tre kritereve atij profesional, e pastërtisë së figurës dhe pasurisë, subjektet do t’i nënshtrohen edhe testit të drogës, si dhe do te vlerësohen edhe varësia nga alkooli lojërat e fatit apo nëse vuajnë nga çrregullimet mendore kronike.
Për kontrollin e pasurisë do te ngarkohet inspektorati i lartë i deklarimit te pasurisë për të përpiluar raportin, ndërsa për kontrollin e figurës do të bashkëpunohet edhe me struktura të tjera si SHISH, DSIK.
Trupa e vlerësimit të Agjencisë së Mbikëqyrjes Policore është e ngjashme me Komisionin e Jashtëm të Vlerësimit/tpz
