Bota

Turqia nuk mund t’i mbrojë vetëm kufijtë juglindorë të NATO-s dhe BE-së

Ministri i Punëve të Jashtme të Turqisë, Mevlut Çavusoglu bëri të ditur se Turqia më nuk do të mund t’i mbrojë vetëm kufijtë e NATO-s dhe të Bashkimit Evropian (BE).

Ministri Çavusoglu shkroi një artikull për gazetën britanike “Financial Times” të titulluar “Inercia e BE-së për refugjatët sirianë është një njollë e zezë për ndërgjegjen e njerëzimit”.

Në artikullin e tij, Çavusoglu kujtoi se BE “pretendon për të qenë një fuqi udhëheqëse botërore në lidhje me respektimin e rendit ndërkombëtar të bazuar në të drejtat dhe rregullat e njeriut”, ndërsa vijoi me këto fjalë: “Sidoqoftë, ky pretendim do të shembet nëse sjellja e Greqisë ndaj refugjatëve dhe BE-së ende mbështetet pa mend”.

Duke vënë në dukje se ai prej kohësh ka paralajmëruar BE-në të mos jetë indiferente ndaj sfidave të tilla si ekstremizmi, ksenofobia, islamofobia dhe antisemitizmi, ministri Çavusoglu tha: “Ne bëmë thirrje për një rishikim të rendit ndërkombëtar për t’u marrë me shpërnguljen masive të njerëzve që ikin nga konfliktet në vendet e tyre, siç është Siria. Gjithashtu vazhdimisht u përpoqëm të bindnim BE-në të na ndihmonte në zgjidhjen e konflikteve të tilla dhe për gjetjen e një zgjidhje për dobësitë që rrethojnë Evropën. Nëse ne nuk mund t’i parandalojmë këto fatkeqësi në burimin e tyre, të gjithë do të vuajnë. Në të vërtetë, lidhja e fundit e zinxhirit të ngjarjeve që filloi me shpërthimin e luftës siriane tregoi se BE-ja nuk mund të shkojë në një rrugë të gjatë për të kuptuar plotësisht çështjen ose për të prodhuar zgjidhje”.

Duke bërë të ditur se Idlibi ishte shndërruar në një “Gaza të re”, ku 3,5 milionë njerëz u lanë në fatin e tyre, 9 vjet pas fillimit të konfliktit në Siri, Çavusoglu kujtoi se Zona e Çtensionimit në Idlib e krijuar në 2018, ka qenë subjekt i sulmeve intensive nga forcat e regjimit sirian të mbështetura nga Rusia dhe Irani, ndërsa tha që sipas të dhënave të OKB-së që nga maji i vitit të kaluar, më shumë se 1 mijë e 700 njerëz janë vrarë në këtë zonë.

Shefi i diplomacisë turke rikujtoi se me kundërpërgjigjen për sulmin e regjimit sirianë ndaj ushtarëve turq në shkurt, Turqia tregoi “pasojat që mund të vijnë pas sulmit ndaj një anëtarit të NATO-s”, ndërsa vijoi me këto fjalë: “Megjithatë, para ndalimit të sulmeve dhe konflikteve në Idlib, 1 milion njerëz janë zhvendosur në kufirin turko-sirian, që paraqet edhe kufirin juglindor të NATO-s dhe BE-së. Aktualisht mirëpresim mbi 3,5 milionë refugjatë sirianë. Përveç kësaj ne ofrojmë ndihmë të drejtpërdrejtë dhe indirekte për 5,5 milionë sirianë brenda Sirisë”.

Çavusoglu bëri të ditur se kjo ka patur një kosto mbi 40 miliardë dollarë për Turqinë.

“Vetëm vitin e kaluar forcat tona të sigurisë ndaluan 455 mijë njerëz që u përpoqën të kalojnë nëpër vendin tonë si emigrantë të paligjshëm. Në këto rrethana, ne nuk mund të vazhdojmë t’i mbrojmë vetëm kufijtë e NATO-s dhe BE-së”, bëri të ditur Çavusoglu.

Duke theksuar se shumë vende në statusin e fqinji të përbashkët janë “pothuajse në zjarr”, ministri Çavuşoğlu tha se kjo situatë përveç valës më të madhe të migrimit që nga Lufta e Dytë Botërore çon edhe në fatkeqësi ekonomike dhe mjedisore.

“Turqia dhe BE-ja janë të obliguara për të gjetur një gjuhë të përbashkët për të adresuar këto çështje. Nëse BE-ja me të vërtetë dëshiron të bëhet një bashkim gjeopolitik, ajo duhet të ndjekë këtë rrugë”, bëri të ditur Çavusoglu në artikullin e tij të publikuar në gazetën “Financial Times”./trt

OPINIONE

INTERVISTA