Presidenti Rexhep Tajip Erdoan (Recep Tayyip Erdoğan) deklaroi se në kuadër të luftës kundër koronavirusit të tipit të ri (COVID-19) do të ndërtohen 2 spitale në Stamboll.
Presidenti Erdoan bëri një deklaratë pas mbledhjes së kabinetit, që edhe këtë javë u zhvillua me anë të videokonferencës.
Ai tha se hap pas hapi janë duke u marrë masa kundër koronavirusit.
“Në Jeshilkëj (Yeşilköy), në Aeroportin Ataturk dhe në Sanxhaktepe (Sancaktepe) do të ndërtojmë spital me kapacitet nga 1 mijë persona secili dhe ato do ti përfundojmë brenda 45 ditëve”, tha ai.
Gjithashtu theksoi se është kapërcyer një fazë e rëndësishme duke bërë mbi 20 mijë teste në ditë dhe në spitale nuk ka asnjë problem për diagnostikimin dhe kurimin e personave të infektuar.
Erdoan tha se nga aspekti i pajisjeve të shëndetësisë, ushqimit dhe pastrimit Turqia është në një pozicion të mirë.
“Shteti ekziston për ditë të këtilla. Shpreh mirënjohjen time për unitetin dhe solidaritetin e treguar”, u shpreh kreu i qeverisë turke.
Ai tha se, në luftën kundër koronavirusit janë të vendosur për të ulur në nivelin më të ulët lëvizjen e njerëzve duke siguruar që të gjithë qytetarët të qëndrojnë në shtëpi, përveç atyre që punojnë dhe janë me detyrë.
“Për kapërcimin e kësaj epidemie ne zotërojmë jo vetëm mundësinë por edhe vendosmërinë morale”, tha Presidenti Erdogan duke shtuar: “Energjinë që kemi depozituar duke qëndruar në shtëpi këto ditë, shpresojmë ta vlerësojmë duke punuar më shumë në periudhën në vijim dhe duke prodhuar akoma më shumë”./trt