I është ndaluar hyrja në territorin e Republikës së Kosovës, Dushica Nikoliç, ndihmëse e drejtorit të të ashtuquajturës zyrë për Kosovën në Qeverinë e Serbisë, Marko Gjuriç.
Sipas pretendimeve të kësaj zyreje, Nikoliç është ndaluar në pikën kufitare të Jarinjës.
“Kjo është vetëm vazhdimësi e shkeljes së marrëveshjeve për lëvizjen e lirë nga Kosova”, thuhet në komunikatën e lëshuar nga zyra e Gjuriçit.
Kujtojmë, se para pak ditësh njëjtë ishte vepruar edhe me zëvendësin e Gjuriçit, Dushan Kozarev.
Fat më të keq se ky i fundit kishte pasur vetë Gjuriç. Ai vitin e kaluar ishte arrestuar nga Njësia Speciale e Kosovës, në aksionin që kishte shkaktuar edhe daljen e Listës Serbe nga Qeveria Haradinaj.
Lajmi.net ka tentuar të kontaktojë edhe me dikë nga ministria e Punëve të Jashtme, mirëpo të njëjtit nuk kanë dhënë detaje lidhur me rastin./Mesazhi/
